អត់ចេះខ្មាសមាត់ទៀតហើយ! កម្ពុជា អបអរខួបប្រាសាទព្រះវិហារចូលជាបេតិកភណ្ឌពិភពលោក ១៧ ឆ្នាំ សារព័ត៌មានថៃមួយថា ប្រាសាទព្រះវិហារនេះ សែរាជវង្សថៃជាអ្នករកឃើញមុន

នៅថ្ងៃទី ៧ ខែកក្កដា ឆ្នាំ ២០២៥ នេះ គឺជាគម្រប់ខួប ១៧ ឆ្នាំ ដែលប្រាសាទព្រះវិហាររបស់ប្រទេសកម្ពុជាបានចុះឈ្មោះចូលជាសម្បត្តិបេតិកភណ្ឌពិភពលោកនៅក្នុងអង្គការយូណេស្កូ តែមើលទៅក្រុមពួកជនជាតិថៃ នៅតែកើតទុកមិនសុខចិត្ត និង ចិញ្ចឹមចិត្តថាប្រាសាទនេះគឺជារបស់ខ្លួនដដែល។

ដោយឡែក នៅថ្ងៃដដែលនេះ សារព័ត៌មាន Khaosod ដែលជាសារព័ត៌មានដ៏ល្បីប្រចាំប្រទេសថៃ បានផ្សព្វផ្សាយនៅផេកហ្វេសប៊ុករបស់ខ្លួនយ៉ាងក្តែងៗដោយមិនខ្មាសអៀនថា ប្រាសាទព្រះវិហារនេះ តាមពិតទៅត្រូវបានរកឃើញដោយព្រះអង្គម្ចាស់ Krom Luang Sappasidhiprasong ដែលជាបុត្រារបស់ស្តេចរាមាទី ៤។ ក្នុងនោះផេកនេះ បានឱ្យដឹងទៀតថា ព្រះអង្គម្ចាស់បានទៅដល់ប្រាសាទនេះនៅឆ្នាំ ១៨៩៩ ហើយព្រះអង្គក៏បានដាក់ឈ្មោះប្រាសាទនេះថាប្រាសាទព្រហ្មវិហារ ទើបក្រោយមកក៏នាំគ្នាហៅថាប្រាសាទព្រះវិហារ។

លុះមកដល់ឆ្នាំ ១៩៦២ តុលាការអន្តរជាតិក៏បានកាត់ក្តីឱ្យប្រទេសកម្ពុជាឈ្នះលើក្តីប្រាសាទព្រះវិហារ ហើយក៏បានសម្រេចឱ្យកម្ពុជាជាប្រទេសដែលមានអធិបតេយ្យភាពលើប្រាសាទព្រះវិហារយ៉ាងពេញលេញ ហើយជនជាតិថៃយល់ថានេះគឺជាការកាត់ក្តីដ៏អយុត្តិធម៌បំផុតសម្រាប់ប្រទេសរបស់ខ្លួន៕

ប្រភព៖ Khaosod