នៅថ្ងៃទី ១០ ខែសីហា ឆ្នាំ ២០២៥ អគ្គនាយក CMAC ឯកឧត្តម ហេង រតនា បានបញ្ជាក់ឱ្យបានដឹងថា ផ្អែកតាមព័ត៌មានកំណត់ត្រាសឹកសង្គ្រាម នៅទិសខេត្តឧត្តរមានជ័យ ការទម្លាក់គ្រាប់បែកពីយន្តហោះថៃមានចំនួន ១ ៥៤៩ គ្រាប់។ ក្នុងនោះអង្គភាព CMAC កំពុងដំណើរការស្រាវជ្រាវ ដាក់ស្លាកសញ្ញា និង បោសម្អាតទីតាំងដែលរងផលប៉ះពាល់ដោយសារការទម្លាក់គ្រាប់បែក និង គ្រាប់កាំភ្លើងធំគ្រប់ប្រភេទ ដើម្បីធានាសុខសុវត្ថិភាពជូនប្រជាពលរដ្ឋ។
លោកបានថ្លែងបែបនេះ ភ្ជាប់ជាមួយនឹងសកម្មភាពនៅថ្ងៃទី ១០ ខែសីហា ឆ្នាំ ២០២៥ ដែលមន្ត្រីអនុពន្ធ័យោធាចំនួន ១៤ រូប ជាតំណាងមកពីប្រទេសចំនួន ៩ រួមមានអូស្ត្រាលី កាណាដា អង់គ្លេស ចិន ជប៉ុន កូរ៉េខាងត្បូង បារាំង ឡាវ និង វៀតណាម បានចុះពិនិត្យទីតាំង និង គ្រាប់បែក MK-84 ស្ថិតនៅភូមិថ្មដូន ឃុំគោកមន ស្រុកបន្ទាយអំពិល ខេត្តឧត្តរមានជ័យ។
លោកបានបញ្ជាក់ឱ្យដឹងទៀតថា គ្រាប់បែក MK-84 នេះ មានទម្ងន់ជិតមួយតោន មានបណ្តោយប្រមាណ ៣.៥ ម៉ែត្រ ទំហំអង្កត់ផ្ចិតជិតកន្លះម៉ែត្រ ផលិតនៅឆ្នាំ ១៩៩៦។ សូមបញ្ជាក់ថានៅចំណុចទីតាំងតែមួយនេះ ថៃបានទម្លាក់គ្រាប់បែកចំនួន ១០ គ្រាប់ ហើយផ្ទុះចំនួន ៤ គ្រាប់ រីឯ ៦ គ្រាប់មិនផ្ទុះ ដោយរួមទាំងគ្រាប់បែក MK-84 ដែលបានឃើញនេះផងដែរ៕
