ថ្មីៗនេះ អ្នកលេងបណ្តាញសង្គមហ្វេសប៊ុក ជាពិសេស សិល្បករ សិល្បការិនីជាច្រើន កំពុងប្រតិកម្ម និង ឆ្លើយតបរបស់ការបញ្ចេញមតិមួយចំនួន បានលើកឡើងថា៖ «តារាថៃចេញមកជេរខ្មែរ តារាខ្មែរមួយចំនួនសំងំដេក ហ៊ឺម អនិច្ចា។ ខ្ញុំតែម្នាក់មិនឈ្នះវាទេ» និង មិតថា៖ «តារាស្រុកខ្មែរល្បីៗមួយចំនួន ស្ងាត់ជ្រាប រឿង Siam ប្រហែលជាប់ sponsor»។
ក្នុងនោះ គេបានឃើញពិធីការិនី ពិន ទេពី, និង តារាសម្តែង ផល ពៅវិរ័ត្ន ព្រមទាំងសិល្បករ សិល្បការិនីផ្សេងទៀត ក៏បានចេញមកឆ្លើយតបភា្លមៗនូវការលើកឡើងខាងលើ។
ជាក់ស្តែង ពិធីការិនី ពិន ទេពី បានរៀបរាប់ថា៖ «សុំឆ្លើយតបបន្តិចចុះ ឃើញថាតារាចាំតែខុសពេក។ ក្នុងនាមខ្ងុំជាសិល្បករមួយរូប ពាក្យថាសិល្បៈ គឺទូលំទូលាយណាស់ ដែលគេងាយមើលឃើញ និង យកគំរូតាម។ ខ្ងុំសុំប្តូរពីការជេរតបទៅប្រទេសចោរ ដោយជួយស៊ែរបន្តតែរឿងល្អៗពីប្រទេសយើង ជួយស៊ែរពីការផុសលើផេកផ្លូវការរបស់រាជរដ្ឋាភិបាលវិញ។ ខ្ញុំជឿជាក់លើការដឹកនាំ និង គ្រប់ការសម្រេចចិត្តរបស់រាជរដ្ឋាភិបាល ហើយខ្ញុំជឿថា អ្នកដែលគេមិនចេញជេរតបទៅវិញ មិនមែនគេមិនចេះជេរ មិនមែនគេខ្លាច គេមិនខ្វល់ ឬគេមិនស្រលាញ់ប្រទេសខ្លួនឯងនោះទេ តែការជេរមិនមែនជាដំណោះស្រាយ កាន់តែជេរកាន់តែមានកំហឹង។ ក្នុងនាមយើងជាប្រជាជនធម្មតា ដែលមិនអាចជួយអ្វីបានក្នុងកាលៈទេសៈមួយនេះ សុំកុំបន្ថែមភ្លើង សុំជួយស៊ែរតែរឿងល្អៗ ដើម្បីផ្តល់កម្លាំងចិត្តជូនរាជរដ្ឋាភិបាល គឺស្មើនឹងយើងជួយជាតិហើយ។ ចោរជេរយើង ជាសណ្តានចោរ ដែលមិនហ៊ានទទួលស្គាល់ការពិតរបស់ចោរ យើងគោរពធ្វើតាមច្បាប់ ជាភាពថ្លៃថ្នូរ ច្បាស់លាស់ ត្រឹមត្រូវរបស់យើង»។
ដោយឡែក លោក ផល ពៅវិរ័ត្ន បានរៀបរាប់ដែរថា៖ «គិតមកត្រឹមម៉ោងនេះ បងចូលមើលផេកប្អូនឃើញប្អូនផុសពីបញ្ហាជម្លោះព្រំដែនបាន ៣ ដង ទើបផុសម្សិលមិញ ម្សិលម្ង៉ៃទៀត មើលតាំងពីមានជម្លោះព្រំដែនមកចូល ១ ខែ ហើយ។ ក្នុងនោះប្អូនផុសជាសំណេរ ២ ដង និង រូបភាព ១ ដង និង សំណេរ ១ ទៀតផុសដៀលអ្នកសិល្បៈ ដែលជាជនរួមជាតិឯង។ ក្រៅពីនឹង ប្អូនផុសប្រម៉ូតផលិតផលយកលុយដាក់ខោប៉ៅខ្លួនឯងសុទ្ធ និង ផុសប្រម៉ូតទាមទារចំណាប់អារម្មណ៍។ បងគិតថាពេលវេលានេះ មិនគួរមកត្រូវខាំគ្នាឯងដែលជាជនរួមជាតិទេ»។
រីឯលោក មុំ សុទ្ធារ៉ា ក៏បានសរសេរថា៖ «និយាយចេញមកធ្វេីដូចកំពុងច្បាំងតែឯង ហេីយសរសេរផុសសោះហ្នឹង ឆ្លៀតពេលរក view រកលុយហេ៎! ហ៊ឺម បងប្អូនគួរក្តាប់ស្ថានការណ៍អោយច្បាស់ និង បារម្ភបងៗកងទ័ពយេីងវិញ គាត់ប្រឹងតស៊ូណាស់។ ជូនពរបងៗកងទ័ពការពារព្រំដែនវិញទៅល្អជាង គាត់កំពុងស្ពាយកាំភ្លេីងជាប់ខ្លួនរហូត ដេកមិនបានពេញភ្នែក ចោលប្រពន្ធកូនគ្រួសារ ដេីម្បីការពារប្រទេសជាតិ»៕
