សិល្បៈចម្លាក់ក្បាច់តាមប្រាសាទនានា រមែងផ្តល់នូវការបំផុសគំនិតមិនចេះចប់ មិនចេះហើយ ដល់កូនខ្មែរតជំនាន់។ ការប្រើប្រាស់ក្បាច់ខ្មែរនៅក្នុងគំនិតច្នៃប្រឌិតសម័យទំនើប ធ្វើឱ្យវត្ថុ ឬ របស់អ្វីមួយនោះ មើលមកលេចធ្លោ និង ប្រណីតបំផុត។ ជាក់ស្តែង ដូចជាប្រ៊េននាឡិកាដៃខ្មែរមួយ ឈ្មោះថា វ៉ាមែន (Verman) បានដកស្រង់ចម្លាក់ កិត្តិមុខ ពីប្រាសាទ មករចនាច្របាច់បញ្ចូលជាមួយក្បាច់ផ្សេងៗ លាយឡំស្ទីលនាឡិកាបែបទំនើប បង្កើតបានជាខូឡិកហ្សិននាឡិកាដៃដ៏ទាក់ទាញមួយ ហៅថា ឌឹកិត្តិមុខ (The Ketemok)។
តាមការបរិយាយរបស់ប្រ៊េននាឡិកានេះនៅលើទំព័រហ្វេសប៊ុក នាឡិកាដៃប្រណីត វ៉ាមែន ឌឹកិត្តិមុខ (The Ketemok/Kirimokha) ត្រូវបានសម្រឹតសម្រាំងយ៉ាងយកចិត្តទុកដាក់បំផុតទៅលើការរចនា ការសិក្សាពីការដាក់បញ្ចូលនូវក្បាច់ និង អត្តសញ្ញាណខ្មែរដ៏អស្ចារ្យ ដូចជាការយករូបកិត្តិមុខ ឬ កេតុដ៏មានអំណាច ដែលតំណាងឱ្យមុខដ៏មានកិត្តិសព្ទ មករួមបញ្ចូលជាមួយក្បាច់អង្គរ ថែមទាំងបានបញ្ចូលនូវក្បាច់ត្របកឈូក មកដាក់នៅលើរង្វង់ផ្ទៃមុខ និង បាតនាឡិកាយ៉ាងទាក់ទាញបំផុត។
បើតាមទំព័រហ្វេសប៊ុក បុរាណាចារ្យ កិត្តិមុខ គឺជាសភាវៈមានតែក្បាល មានមាត់ធំ មើលទៅកោងកាចមានឫទ្ធិអំណាច ដែលយើងតែងប្រទះឃើញឆ្លាក់នៅចំកណ្តាលផ្តែរនៃក្លោងទ្វារប្រាសាទនានានោះគឺ កិត្តិមុខ ឬ ហៅម្យ៉ាងទៀតថា កាល មិនមែនជារាហ៊ូនោះទេ។ កិត្តិមុខជាសភាវៈ ដែលមានកំណើតចេញពីអំណាចរបស់ព្រះសិវៈជាម្ចាស់ នៅក្នុងវប្បធម៌ស្ថាបត្យកម្មព្រហ្មញ្ញសាសនា។ កិត្តិមុខ ឬ កាល នេះត្រូវបានគេនិយមឆ្លាក់ជាលម្អជានិមិត្តសញ្ញាមុខ ក្លោងទ្វារចូលនៃទីសក្ការៈនានា មិនថានៅក្នុងស្ថាបត្យកម្មឥណ្ឌា ឥណ្ឌូនេស៊ី ខ្មែរ ឬ ចម្ប៉ា ជាដើម។
ត្រលប់មកនាឡិកានេះវិញ ក្រៅពីដាក់បញ្ចូលក្បាច់ខ្មែរ នាឡិកាក៏រចនាអមមកជាមួយត្បូងរាប់ពាន់គ្រាប់ដ៏ភ្លឺចែងចាំងប្រៀបបានដូចទៅនឹងត្បូងពេជ្រតែម្តង។ ក្រៅពីនោះម៉ូដនេះក៏ត្រូវបានគិតគូរយ៉ាងល្អិតល្អន់អំពីគ្រឿងបង្គុំល្អៗ ដែលធានានូវការប្រើប្រាស់បានយូរអង្វែងជូនអ្នកប្រើប្រាស់ផងដែរ។
ចំពោះតម្លៃវិញ តាមការបញ្ជាក់ភ្ជាប់មកផងនោះ ចំពោះ នាឡិកានារី តម្លៃ ៧៤៩ ដុល្លារ ចំណែក នាឡិកាបុរស តម្លៃ ៧៩៩ ដុល្លារ៕
