បើគិតមកដល់ពេលនេះ រយៈទើបតែ ១ ឆ្នាំ ២ ខែ តែប៉ុណ្ណោះ ដែលតារាចម្រៀងរ៉េប យូហៃ បានក្លាយជាតារាចម្រៀងអាជីព និង ជ្រកក្រោមផលិតកម្មបារមី ក្រោយពីបានក្លាយទៅជាម្ចាស់ពានរង្វាន់កម្មវិធី The Rapper Cambodia រដូវកាលទី ១។
បើទោះជាត្រឹមរយៈពេលខ្លីក្នុងវិថីសិល្បៈ តែ យូហៃ ឆក់បានប្រជាប្រិយភាពយ៉ាងលឿនគួរឱ្យកត់សម្គាល់ពីទស្សនិកជន ដោយលោកមិនត្រឹមតែបានបង្ហាញវត្តមានលើឆាកនានាក្នុងប្រទេសនោះទេ ពោលគឺលោក យូហៃ ក៏បានក្តោបឱកាសបង្ហាញវត្តមានក្នុងកម្មវិធីប្រគំតន្ត្រីលំដាប់អន្តរជាតិទៀតផង។
ជាក់ស្តែង កាលពីអំឡុងខែកញ្ញា ឆ្នាំ ២០២៤ កន្លងទៅ យូហៃ ត្រូវបានអញ្ជើញទៅសម្តែងនៅក្នុងកម្មវិធី AXEAN Festival 2024 ជាមួយនឹងសិល្បកររៀមច្បងជាច្រើន។ លើសពីនោះ អ្វីដែលកាន់តែគួរឱ្យចាប់អារម្មណ៍ លោក យូហៃ ត្រូវបានអញ្ជើញចូលរួមទៅសម្តែងនៅកម្មវិធី Sabaidee Fest នាខែកក្កដា ឆ្នាំ ២០២៥ ខាងមុខនេះ នៅឯទីក្រុង Los Angeles សហរដ្ឋអាមេរិក។
ក្នុងនោះ អ្វីដែលកាន់តែគួរឱ្យចាប់អារម្មណ៍បន្ថែម គឺលោក យូហៃ ទោះជាប្រឡូកលើវិថីសិល្បៈជាង ១ ឆ្នាំ ប៉ុន្តែលោកមានសមត្ថភាព និង ឱកាសបានទៅសម្តែងលើឆាកអន្តរជាតិ ដែលជាកម្មវិធីតែមួយនឹងរៀមច្បងរបស់លោក គឺកំពូលតារាចម្រៀងរ៉េប វណ្ណដា ក៏ធ្លាប់បានទៅសម្តែងកាលពីឆ្នាំមុនៗដែរ៕
