គ្រប់គ្នាសុទ្ធតែដឹងថា Rolex គឺម៉ាកនាឡិកាប្រណីតលំដាប់ខ្ពស់ និង ល្បីល្បាញលើពិភពលោក។ កាន់តែគួរឱ្យចាប់អារម្មណ៍ទៀតនោះ ថ្មីៗនេះ កូនខ្មែរមួយរូប ដែលល្បីជាកូនភ្លោះសង្ហាគឺ លោក Sovannpranidh Kiet បានបញ្ចេញគំនិតក្នុងការច្នៃនាឡិកាទំនើប Rolex មកបូកផ្សំជាមួយសិល្បៈបុរាណខ្មែរ។
ជាក់ស្តែង ទើបបង្ហោះលើគណនីហ្វេសប៊ុកថ្មីថ្មោង កូនភ្លោះសង្ហារូបនេះ បានបង្ហាញនាឡិកា Rolex មួយគ្រឿង ដែលត្រង់ខ្សែនាឡិកាមានរំលេចក្បាច់ឆ្លាក់ អាចសម្គាល់បានយ៉ាងច្បាស់ ជាចម្លាក់រឿងកូរសមុទ្រទឹកដោះ ដែលមាននៅលើជញ្ជាំងប្រាសាទអង្គរវត្ត។
តាមការសរសេរភ្ជាប់នឹងរូបភាព លោក Sovannpranidh Kiet បានដាក់ថា នេះជាការដាក់បញ្ចូលគ្នារវាងសិល្បៈបុរាណ និង ប្រណីតភាពទំនើប។ ខ្សែនាឡិកាធ្វើឡើងពីប្រាក់សុទ្ធ ដកស្រង់ពីរឿងកូរសមុទ្រទឹកដោះ ប្រាសាទអង្គរវត្ត។ រូបតួអង្គនៅលើខ្សែនាឡិកាខាងឆ្វេង និង ខាងស្តាំ សុទ្ធតែមានរូបខុសគ្នា ដោយយកលំនាំតាមចម្លាក់នៅលើជញ្ជាំងប្រាសាទតែម្តង។ គំនិតច្នៃប្រឌិតនេះ គឺចេញពីលោកផ្ទាល់ ចំណែកអ្នកគូរ 3D គឺ Cho-Cho Chhean៕
