មហាជននិយមតានដាន ជីវិតឯកជនរបស់ពិធីការិនីស្រស់សោភា អ្នកនាង ជីមមី ម៉េង ច្បាស់ជាបានជ្រាបហើយ ក្រៅពីអាជីពសិល្បៈ និង មាន Business ក្នុងដៃ តារាស្រីរូបនេះ ក៏តែងតែផលិតមាតិកានានា បង្ហាញជូនអ្នកគាំទ្រជាប្រចាំផងដែរ។
ជាក់ស្តែង មួយរយៈក្រោយនេះ អ្នកនាង ជីមមី ក៏តែងតែងបង្ហោះនូវសកម្មភាពនានានៃការដើរកម្សាន្តក្រៅប្រទេសរបស់អ្នកនាង ជាមួយនឹងស្វាមី ក៏ដូចជាបង្ហាញពីរឿងផ្សេងៗទៅតាមតំបន់ ដែលអ្នកនាង និងស្វាមីបានទៅផងដែរ។
តួយ៉ាង វីដេអូ ដែលអ្នកនាង ជីមមី ម៉េង បានបង្ហោះនៅថ្ងៃទី ១៨ ខែមេសា ឆ្នាំ ២០២៥ នេះ កំពុងទទួលបានការចាប់អារម្មណ៍ ខណៈពិធីការិនីរូបនេះ បង្ហាញពីល្បែងកម្សាន្តចម្លែកមួយនៅក្រៅប្រទេស ដើម្បីបញ្ចេញកំហឹង។
ក្នុងនោះ អ្នកនាង ជីមមី ម៉េង បានឱ្យដឹងថា កន្លែងនាងទៅលេងនោះ គឺគេហៅថាបន្ទប់បញ្ចេញកំហឹង ដែលអ្នកណាចង់ទៅបញ្ចេញកំហឹងអាចទៅទីនោះបាន។ ម្យ៉ាងវិញទៀត អ្នកនាង ជីមមី បានបញ្ជាក់ថា នៅសហរដ្ឋអាមេរិក សូម្បីតែការស្រែកបញ្ចេញកំហឹងនៅទីសាធារណៈ ក៏មិនអាចធ្វើបានដែរ ដូច្នេះហើយ បន្ទប់បញ្ចេញកំហឹង នេះ គឺជាកន្លែងដ៏ល្អបំផុតសម្រាប់អ្នកចង់បញ្ចេញអារម្មណ៍ ឬបញ្ចេញកម្លាំងរំសាយរាល់កំហឹងរបស់ខ្លួន។ ការលេងនៅក្នុង បន្ទប់បញ្ចេញកំហឹង នេះដែរ គឺគេរៀបចំសព្វគ្រប់បែបយ៉ាង មានទាំងចានឆ្នាំ សម្ភារនានា ដែលអាចឱ្យអ្នកទៅលេងបោកចោល វាយកម្ទេចតាមចិត្តថែមទៀតផង៕
