កាលពីថ្ងៃទី ៧ ខែសីហា ឆ្នាំ ២០២៥ កន្លងទៅ នៅប្រទេសថៃ មានករណីឡានក្រុងដឹកសិស្សមួយគ្រឿង ជ្រុលចង្កូតក្រឡាប់ធ្លាក់ផ្លូវ បង្កឱ្យសិស្ស ២ នាក់បាត់បង់ជីវិត និង របួសអស់ជាច្រើននាក់។
តាមព័ត៌មានបានឱ្យដឹងថា ហេតុការណ៍បានកើតឡើងនៅផ្លូវមួយកន្លែង នាស្រុកសេកា ខេត្តបឹងកាប ដោយឡានក្រុងខាងលើនេះមានផ្ទុកសិស្សរហូតដល់ទៅ ៤០ នាក់។ តាមអ្នកបើកបរបានឱ្យដឹងថា ខ្លួនបើកបរក្នុងល្បឿន ៦០ គីឡូម៉ែត្រក្នុងមួយម៉ោង លុះមកដល់កន្លែងហេតុ ស្រាប់តែមានកង់ឡានក៏បានធ្លាក់ផ្លូវ តៃកុងព្យាយាមទាញចង្កូតមកវិញ តែក៏ជ្រុលក្រឡាប់ផ្ងារជើងតែម្តង។
យ៉ាងណាមិញ ក្នុងនោះមានសិស្ស ២ នាក់ បានស្លាប់បាត់បង់ជីវិត និង ៨ នាក់បានរងរបួស ក្នុងចំណោមនោះ មាន ១ នាក់បានរងបួសធ្ងន់។ ដោយឡែក សមត្ថកិច្ចនគរបាលប៉ុស្តិ៍ស្រុកសេកា កំពុងស្រាវជ្រាវរកមូលហេតុពិតប្រាកដនៃការគ្រោះថ្នាក់មួយនេះផងដែរ៕
ប្រភព៖ Khaosod
