ថ្មីៗនេះនាយកដ្ឋានបសុសត្វរបស់ថៃ បានចេញសេចក្តីប្រកាសព្រមានដាស់តឿនប្រជាជាជនខ្លួន ឱ្យមានការប្រុងប្រយ័ត្នចំពោះការផ្ទុះឆ្លងជំងឺឆ្កែឆ្កួត ក្រោយពីរកឃើញថាមានសត្វចំនួន ២ ក្បាលបានកើតជំងឺនេះនៅក្នុងទីក្រុងបាងកក។
តាមព័ត៌មានបានឱ្យដឹងថា បន្ទាប់ពីរកឃើញថាសត្វពាហនៈចំនួន ២ ក្បាល នៅសង្កាត់ណងប៊ុន ខណ្ឌប្រាវេត ទីក្រុងបាងកក មានផ្ទុកជំងឺឆ្កែឆ្កួត ខាងនាយកដ្ឋានបសុសសត្វក៏បានចេញសេចក្តីប្រកាសដាក់តំបន់ចំនួន ៩ ជាតំបន់ផ្ទុះជំងឺឆ្កែឆ្កួតបណ្តោះអាសន្ន ចាប់ពីថ្ងៃទី ៩ ខែកញ្ញា ដល់ថ្ងៃទី ៨ ខែតុលា ឆ្នាំ ២០២៥។
ក្នុងនោះ តំបន់ទាំងនោះមានដូចជាខណ្ឌមួយចំនួនក្នុងទីក្រុងបាងកក គឺខណ្ឌប្រាវេត ខណ្ឌសួនលួង ខណ្ឌសាក់ផានស៊ូង ខណ្ឌឡាតក្រាក់បាំង ខណ្ឌបាងណា ខណ្ឌផ្រាក់ខាណូង រីឯខេត្តសាមុតប្រកាន មានឃុំបាងកែវ ឃុំរាតឆៈទេវី និង ស្រុកបាងភ្លី។ អាជ្ញាធរបានណែនាំឱ្យអ្នករស់នៅតំបន់នេះមានការប្រុងប្រយ័ត្នឱ្យបានខ្ពស់ ចៀសវាងការប៉ះពាល់សត្វអនាថា និងរកការព្យាបាលឱ្យទាន់ពេលវេលាបើសិនជាមានសត្វខាំ៕
ប្រភព៖ Khaosod
