Plastique Tiara គឺជាឈ្មោះរបស់នាងនៅក្នុងវិស័យ Drag Queen ឬឆាកសម្តែង ខណៈដែលឈ្មោះពិតគឺ Duc Tran Nguyen នាងចាប់កំណើតនៅប្រទេសវៀតណាម។ បច្ចុប្បន្ន តារា Drag Queen មានសញ្ជាតិវៀតណាម-អាមេរិករូបនេះ មានភាពល្បីល្បាញខ្លាំងទាំងប៉ែកអាស៊ី និង អឺរ៉ុប។ នាងមានអ្នកតាមដាននៅលើ TikTok ប្រមាណ 11M រីឯនៅលើបណ្តាញសង្គមហ្វេសប៊ុក និង Instagram ប្រមាណជិត 2M។
Plastique Tiara ជាតារា Drag ដ៏មានមន្តស្នេហ៍ និង ទេពកោសល្យខ្ពស់ ពេលតុបតែងខ្លួនជាបុរសក៏សង្ហា រីឯពេលប្រែខ្លួនជាស្រីក៏រឹតតែស្រស់ស្អាត។ ជាមួយឥទ្ធិពលរបស់នាង ក្រៅពីអាជីពសម្តែង នាងក៏ជាអ្នករាំ និង ជាតារាម៉ូឌែលដ៏មានប្រជាប្រិយភាពផងដែរ។ នាងធ្លាប់បង្ហាញមុខលើក្របទស្សនាវដ្តីអន្តរជាតិល្បីៗ ថតម៉ូដ និង បានចេញសម្តែងលើឆាកអន្តរជាតិជាច្រើន។ ហ្វេនរបស់នាងមានសឹងប្រទេសជុំវិញពិភពលោក។
អ្វីកាន់តែធ្វើឱ្យហ្វេន និង អ្នកក្នុងវិស័យ Drag Queen រំភើបចិត្តទៀតនោះ ថ្មីៗនេះ Plastique Tiara បានប្រកាសភ្ជាប់ពាក្យ ដោយនាងបានបង្ហោះរូបភាព ៣ សន្លឹកនៅលើបណ្តាញសង្គម។ រូបភាពបង្ហាញពីបុរសគូស្នេហ៍បានសុំនាងរៀបការ នាងបានឱបដៃគូ និង បង្ហាញចិញ្ចៀនទាំងគូ មើលមកពិតជារ៉ូមែនទិក និង ផ្អែមល្ហែមបំផុត។ ហ្វេនៗ មិត្តភក្តិ និង អ្នកក្នុងវិស័យ Drag Queen ពិតជារំភើបចិត្តចំពោះដំណឹងនេះ ដោយសម្តែងការអបអរចូលទៅ Comment ពាក្យ Congratulation គ្រប់ៗគ្នា។
គួរឱ្យដឹងដែរថា តាមរយៈសិល្បៈតុបតែងខ្លួន និង ការសម្តែង Plastique Tiara នាងបានទាក់ទាញអ្នកគាំទ្រជុំវិញពិភពលោក។ នាងក៏ទទួលបានភាពល្បីល្បាញខ្លាំង នៅពេលចូលប្រកួតក្នុងកម្មវិធី Drag ដ៏ល្បីរបស់អាមេរិក RuPaul’s Drag Race រដូវកាលទី ១១ ដោយបានចំណាត់ថ្នាក់លេខ ៦ និង កម្មវិធី All Stars 9 បានចំណាត់ថ្នាក់លេខ ៤៕
