ពិតណាស់ ស្របពេលកម្មវិធីប្រកួតថ្វីដៃធ្វើម្ហូបលំដាប់ពិភពលោក MasterChef Cambodia រដូវកាលទី ៤ បានប្រកាសបើកទទួលពាក្យជ្រើសរើសបេក្ខភាពប្រកួតប្រជែងដណ្ដើមពានរង្វាន់ប្រចាំរដូវកាលនេះ ក៏បានឃើញវត្តមានរបស់អ្នកបង្កើតមាតិកាធ្វើម្ហូបល្បីឈ្មោះលោក លី ឧត្តម បានដាក់ពាក្យចូលប្រកួតកម្មវិធីនេះដែរ។
ដោយឡែក ក្រោយប្រកាសដាក់ពាក្យចូលប្រកួតមិនបានប៉ុន្មាន ខណៈកម្មវិធីមិនទាន់ចាប់ផ្ដើមដំណើរជាផ្លូវការផង ថ្មីៗនេះ ក៏បានឃើញលោក លី ឧត្តម បង្ហោះលើហ្វេសប៊ុកជូនដំណឹងយ៉ាងភ្ញាក់ផ្អើលដល់បណ្ដាអ្នកគាំទ្ររបស់លោកឱ្យដឹងថា លោកមិនអាចចូលរួមប្រកួតក្នុងកម្មវិធី MasterChef Cambodia រដូវកាលទី ៤ នេះវិញ ដោយមិនបានបញ្ជាក់ហេតុផលជាក់លាក់ឡើយ គ្រាន់តែបង្ហើបថា លោកមានហេតុផលជាច្រើនដែលមិនអាចបន្តបាន។
ក្នុងនោះ លោក លី ឧត្តម បានរៀបរាប់លើហ្វេសប៊ុកថា ៖ «MasterChef វគ្គ ៤ អត់មានវត្តមានរបស់ខ្ញុំទេ សុំទោសដែលឱ្យរង់ចាំ សុំទោសដែលធ្វើឱ្យខកចិត្ត។ កុំរង់ចាំ ខ្ញុំ អី សូមផ្តល់កម្លាំងចិត្តដល់បេក្ខជន ដែល មានវត្តមានក្នុងពេលឆាប់ឆាប់នេះ Thanks for love me»៕
