ទាក់ទងនឹងសកម្មភាពសប្បុរសធម៌របស់មហាជនកម្ពុជា និង អ្នកសិល្បៈ មកដល់ពេលនេះ ដ្បិតតែស្ថានភាពប្រទេសប្រសើរវិញបន្តិច ក៏មហាជននៅតែបន្តបង្ហាញសកម្មភាពរួបរួមកម្លាំងស្មារតី ត្រៀមសម្រាប់ផ្ដល់ជំនួយដល់កងទ័ពជួរមុខ ដែលកំពុងឈរក្នុងសមរភូមិផងដែរ។
ជាក់ស្ដែង ក្រឡេកមើលហ្វេសប៊ុករបស់តារាស្រី និង ជាបេក្ខភាពបវរកញ្ញា Miss Universe Cambodia 2025 ហ្វីយ៉ាតា ក៏ឃើញនាងនៅបន្តបង្ហាញសកម្មភាពសប្បុរសធម៌ ខណៈកន្លងមកនាងបានប្រើទាំងសំឡេង និង កម្លាំងស្មារតីចូលរួមជាចំណែកជួយផ្សព្វផ្សាយពីប្រទេសជាតិ ក៏ដូចជារៀបចំស្បៀងអាហារជាមួយសិល្បករដទៃ ចុះផ្ដល់ជំនួយដល់កងទ័ពជួរមុខ និង បងប្អូនភៀសសឹកជាច្រើនដែរ។
មកដល់ថ្មីៗនេះ ក៏បានឃើញអ្នកនាង ហ្វីយ៉ាតា បង្ហោះប្រកាសមិនទាន់ហ៊ានឈប់ និង មិនទុកចោលវីរបុរសជាតិ ដែលនាងបន្តប្រើសំឡេងរបស់ខ្លួនធ្វើមូលនិធិ ដើម្បីជួយដល់បងៗកងទ័ពជួរមុខ និង គ្រួសារភៀសសឹក រហូតដល់ប្រទេសជាតិមានសុខសន្តិភាពពេញលេញវិញ។
ក្នុងនោះ អ្នកនាង ហ្វីយ៉ាតា បានបង្ហោះរៀបរាប់លើហ្វេសប៊ុកផេកថា ៖ «កុំទាន់ដកភ្នែកចេញពីពួកគាត់អី ពួកគាត់នៅតែកំពុងត្រូវការយើងបំផុត.. ពួកខ្ញុំមិនឈប់ត្រឹមនេះទេ ខ្ញុំមិនទុកអ្នកចោលឡើយ… សំឡេងខ្ញុំឮបានដល់ណា ខ្ញុំស្រែកដល់នោះ ទោះអ្នកណានិយាយឬថាអ្វីក៏ដោយ.. យើងបានដេកផ្ទះស្រួលរាល់យប់ ក៏ព្រោះពួកគាត់យកខ្លួន និង ជីវិត ទៅការពារប្រទេសយើង..ខ្ញុំនឹងបន្តធ្វើវា ហើយធ្វើរហូតដល់ ដរាបណាប្រទេសខ្ញុំសុខសន្តិភាពវិញ, បងប្អូនកងទ័ពបានមានហូបគ្រប់គ្រាន់… ហើយប្រជាជនខ្មែរដែលភៀសសឹកទាំងអស់បានត្រលប់ទៅផ្ទះរស់សុខស្រួលវិញ។ ខ្ញុំនឹងធ្វើគ្រប់យ៉ាង ដោយកម្លាំងមនុស្សស្រីម្នាក់អាចធ្វើបាន.. ខ្ញុំប្រកាសមូលនិធិនេះជាផ្លូវការ ឱ្យបងប្អូនចូលរួម ជាមួយខ្ញុំឆាប់ៗនេះ.»៕
