មកដល់ពេលនេះ រយៈពេល ១ ខែហើយ ដែលពិធីការិនី ហ៊ិន នីរ័ត្ន និង ស្វាមី បានទទួលចំណងដៃជីវិតដ៏មានតម្លៃ គឺជាកូនប្រុសដ៏គួរឱ្យក្នាញ់ដាក់ឈ្មោះថា ឌី ពេជ្ររ័ត្នបញ្ញាបុត្រ ដោយបានសម្រាលឃើញពន្លឺព្រះអាទិត្យ កាលពីថ្ងៃទី ៨ ខែកក្កដា ឆ្នាំ ២០២៥ កន្លងទៅ ក្រោមការអបអរសាទរពីសំណាក់សាច់ញាតិបងប្អូន និង មិត្តអ្នកសិល្បៈ ក៏ដូចជាអ្នកគាំទ្រលើបណ្ដាញសង្គម។
ពេលនេះដែរ អូនតូច ឌី ពេជ្ររ័ត្នបញ្ញាបុត្រ កូនប្រុសបណ្ដូលចិត្តរបស់អ្នកនាង ហ៊ិន ច័ន្ទនីរ័ត្ន និង ស្វាមី មានអាយុ ១ ខែហើយ កាន់តែគួរឱ្យក្នាញ់ សាច់ឈាមទ្រលុកទ្រលន់ មុខមាត់ឡើងក្រឡង់ៗ ដែលទទួលបានការមើលថែថ្នាក់ថ្នមយ៉ាងកក់ក្ដៅពីប៉ាម៉ាក់។
យ៉ាងណាមិញ មកដល់ថ្ងៃទី ៨ ខែសីហា ឆ្នាំ ២០២៥ នេះដែរ ក៏បានឃើញអ្នកនាង ហ៊ិន ច័ន្ទនីរ័ត្ន និង ស្វាមី បានរៀបចំកម្មវិធីចេញខែបង្កក់សិរីឱ្យយ៉ាងសាមញ្ញមួយនៅក្នុងផ្ទះ និង និមន្តព្រះសង្ឃសូត្រមន្ត ប្រោះទឹកបង្កក់សិរីឱ្យកូនប្រុសជាមួយក្រុមគ្រួសារពេញដោយស្នាមញញឹម និង កក់ក្ដៅ៕
