ប្រហែល ៦៦ លានឆ្នាំមុន សត្វដាយណូស័រ Tyrannosaurus rex ឬហៅកាត់ថា T. rex បានកំពុងរស់នៅ និង បង្កភាពភ័យខ្លាចដល់ធម្មជាតិនៅជុំវិញខ្លួនវា។ បើទោះឥលូវ វាលែងមានជីវិតលើភពផែនដីតទៅទៀត តែគេបានកំពុងទាញយកវាមកវិញ ដោយផលិតជារបស់ប្រើប្រាស់ជាមួយ DNA ពិតប្រាកដ។
ជាការពិតណាស់ បច្ចុប្បន្ន អ្នកស្រាវជ្រាវ និង វិស្វករជីវសាស្រ្តបានកំពុងធ្វើការយ៉ាងសកម្មដើម្បីបង្កើតកាបូបប្រណីត ដែលមិនប៉ះពាល់ដល់ជីវិតសត្វ និង និរន្តរភាព ដោយប្រើស្បែក ដែលដាំដុះដោយមន្ទីរពិសោធន៍ ពីហ្វូស៊ីលសត្វដាយណូស័រ Tyrannosaurus rex ឬ T. rex។
ប្រតិបត្តិការនេះ ជាការសហការគ្នារវាងក្រុមហ៊ុនចំនួន ៣ គឺក្រុមហ៊ុនភ្នាក់ងារច្នៃប្រឌិត VML, ក្រុមហ៊ុនដឹកនាំផ្នែកវិស្វកម្មហ្សែន The Organoid Company និង ក្រុមហ៊ុនត្រួសត្រាយបច្ចេកវិទ្យាជីវសាស្រ្តប្រកបដោយនិរន្តរភាព Lab-Grown Leather Ltd។ ពួកគេនឹងបង្ហាញពីរបៀប ដែលជីវវិទ្យាបុរាណអាចបង្កើតជាសម្ភារជំនាន់ក្រោយ ដែលនឹងមានឥទ្ធិពលលើអនាគតនៃផលិតផលប្រណីត។
ក្នុងដំណើរការបង្កើតជាស្បែក ខូឡាជិននៃហ្វូស៊ីលដាយណូស័រ T. rex ដែលដាំដុះក្នុងមន្ទីរពិសោធន៍ នឹងត្រូវបានប្រើជាប្លង់មេ ដើម្បីផលិតសម្ភារ ដែលមានរចនាសម្ព័ន្ធដូចគ្នាទៅនឹងស្បែកប្រភពដើម។ ដើម្បីបង្កើតស្បែកឡើងបាន គេត្រូវប្រើ DNA សំយោគ ដើម្បីវិស្វកម្មកោសិកា បន្ទាប់មកដាក់បញ្ចូលវាទៅក្នុងដំណើការស្ទ្រីមផលិតផល Elemental-X ដែលជាវិធីសាស្រ្តអនុញ្ញាតឱ្យកោសិកាបញ្ចូលគ្នានៅក្នុងរចនាសម្ព័ន្ធធម្មជាតិរបស់វា។
បើយោងតាមក្រុមហ៊ុន VML ស្បែកដាយណូស័រ T. rex ដែលដាំដុះដោយមន្ទីរពិសោធន៍នេះ វាលើសពីគំរូដើម ពោលវាផ្តល់នូវគុណភាពប្រើប្រាស់ពីធម្មជាតិបានរយៈពេលយូរ អាចជួសជុលបាន និង មានផាសុកភាព។
ស្បែកដាយណូស័រ T. rex វានឹងមិនត្រឹមតែមានទីផ្សារសម្រាប់ឧស្សាហកម្មហ្វេហ្សិនដូចជា ធ្វើជាសម្លៀកបំពាក់ កាបូប និង របស់ប្រើប្រាស់ផ្សេងៗប៉ុណ្ណោះទេ តែថែមទាំងមានឥទ្ធិពលនៅក្នុងវិស័យរថយន្តផងដែរ។
ការអនុវត្តផលិតស្បែកដាយណូស័រដំបូងបំផុតនេះ គេបានផ្តោតគោលដៅចម្បងសម្រាប់ផលិតទំនិញប្រណីតបែបពាណិជ្ជកម្ម ហើយរំពឹងថានឹងចេញផ្លូវការនៅចុងឆ្នាំ ២០២៥ នេះ៕
ប្រភព៖ NYP
