នៅថ្ងៃទី ១៩ ខែសីហា ឆ្នាំ ២០២៥ សារព័ត៌មានថៃបានចុះផ្សាយបំភ្លៃ ដោយបានសម្ដែងជារូបថត និង វីដេអូ ធ្វើសកម្មភាពនៃការដាក់មីន ដើម្បីបង្កើតជាលេសថ្មីចោទប្រកាន់ និង មួលបង្កាច់មកលើកងទ័ពកម្ពុជា។
ទាក់ទិនទៅនឹងរឿងនេះ តាមប្រភពព័ត៌មានបានឱ្យដឹងថា យោងតាមអ្នកជំនាញ ទាំងវីដេអូ និង រូបថតដែលកងទ័ពថៃបានបញ្ចេញតាមប្រព័ន្ធផ្សព្វផ្សាយថៃ ជារូបភាពដែលចេញមកពីការរៀបចំឈុតឆាកសម្តែងសុទ្ធសាធ ដើម្បីពួកគេបានរូបភាពយកមកចោទកងទ័ពកម្ពុជា ដូចដែលពួកគេធ្លាប់បានធ្វើពីមុនមក ដើម្បីមួលបង្កាច់ ចោទប្រកាន់ កងទ័ពកម្ពុជាថាដាក់មីនថ្មី ដើម្បីពួកគេបានជាលេសក្នុងការធ្វើសកម្មភាពឈ្លានពានប្រដាប់អាវុធ។
ក្នុងនោះ អ្នកជំនាញបានលើកឡើងថា បើជាការលួចដាក់មីនមែន មិនមែនមានអ្នកចាំថតវីដេអូបន្សល់ទុកភស្តុតាងនោះទេ។ បើជាការលួចដាក់មីនមែន មិនមែនធ្វើតាមសម្រួលនោះទេ ប្រាកដជាមានភាពប្រុងប្រយ័ត្នខ្ពស់ និង រហ័សរហួនបំផុត។ ជារួម ទាំងវីដេអូ និង រូបថតដែលភាគីថៃចោទប្រកាន់ថាកងទ័ពកម្ពុជាលួចដាក់មីន ជាការរៀបចំឆាកសម្តែង ដើម្បីថតជារូបភាពសម្រាប់ការចោទប្រកាន់មកលើកងទ័ពកម្ពុជាខណៈជនជាតិថៃ ដែលជាខ្មែរសុរិន្ទ អាចនិយាយខ្មែរបានយ៉ាងច្បាស់ ហើយសម្លៀកបំពាក់កងទ័ពកម្ពុជា ក្រមា និង សម្ភារផ្សេងទៀត អាចរកទិញបាននៅលើទីផ្សារថៃបានយ៉ាងងាយបំផុត។
លើសពីនេះ អ្នកជំនាញបន្តថា ភាគីថៃពូកែសម្តែងណាស់ បញ្ចេញវីដេអូទី១ គេមិនជឿ រៀបចំឈុតឆាកសម្តែងដាក់មីនដើម្បីថតផ្សព្វផ្សាយមួលបង្កាច់ម្តងទៀត ប៉ុន្តែនៅតែសាធារណជនបញ្ចេញមតិមិនជឿដដែល៕
ប្រភព ៖ Fresh News
