មានហេតុការណ៍ដ៏គួរឱ្យហួសចិត្ត និង អស់សំណើចមួយនៅតៃវ៉ាន់ ដែលមានម្ចាស់ផ្ទះមួយខ្នងទិញទុរេនមកហូបនៅផ្ទះ តែក្លិនខ្លាំងពេក ដល់ថ្នាក់អ្នកជិតខាងស្មានថាក្លិនធ្លាយពីធុងហ្គាស មានអីហៅឡានពន្លត់អគ្គិភ័យមករាប់គ្រឿង ផ្អើលពេញភូមិ។
តាមស្រ្តីម្នាក់បានរៀបរាប់ឱ្យដឹងថា នៅយប់ថ្ងៃកើតហេតុនៅម្តុំផ្ទះនាងហាក់មានការចលាចលជាខ្លាំង ព្រោះនាងបានឮសំឡេងឡានទឹកជាច្រើនគ្រឿង ហើយនាងភ័យពេក ក៏បានរត់ទៅដាស់ឪពុកម្តាយ រួចក៏ចុះមកក្រោមមើលស្ថានការណ៍។ លុះនាងចុះមកដល់ អាជ្ញាធរក៏បានប្រាប់នាងថា មានអ្នកនៅម្តុំនេះឱ្យដំណឹងថាធុំក្លិនហ្គាស ទើបមកអន្តរាគមន៍។
យ៉ាងណាមិញ អាជ្ញាធរបានប្រើឧបករណ៍ចាប់ក្លិនហ្គាសអស់ជាង ២០ នាទី តែមិនឃើញមានអ្វីសោះ ចុងក្រោយទើបដឹងថា មានផ្ទះមួយខ្នងបានទិញទុរេនមកហូប តែក្លិនខ្លាំងពេក ទើបធ្វើឱ្យអ្នកជិតខាងច្រឡំស្មានថាក្លិនធ្លាយពីធុងហ្គាស ទើបនាំគ្នាផ្អើលហៅឡានពន្លត់អគ្គិភ័យមកតែម្តង៕
ប្រភព៖ Khaosod
