ថ្មីៗនេះ សារព័ត៌មាន Indian Express បានរាយការណ៍ពីករណីដ៏គួរឱ្យហួសចិត្តមួយនៅប្រទេសអង់គ្លេស ដែលមានគ្រូពេទ្យមួយរូប កំពុងតែវះកាត់អ្នកជំងឺសុខៗ ស្រាប់តែសុំសម្រាក ហើយលួចទៅមានអីៗជាមួយគ្រូពេទ្យស្រីម្នាក់ទៀតស្ងាត់ៗ។
តាមព័ត៌មានបានឱ្យដឹងថា រឿងរ៉ាវនេះបានកើតឡើងតាំងពី ២០១៥ កន្លងទៅ ដោយវេជ្ជបណ្ឌិតរូបនេះមានឈ្មោះថា Suhail Anjum វ័យ ៤៤ ឆ្នាំ ជាឯកទេសខាងថ្នាំស្ពឹកនៅមន្ទីរពេទ្យ Tameside ក្នុងទីក្រុង Greater Manchester ភាគខាងជើងនៃប្រទេសអង់គ្លេស។ កាលណោះ នៅពេលកំពុងតែវះកាត់ថង់ទឹកប្រមាត់ឱ្យអ្នកជំងឺម្នាក់ ស្រាប់តែវេជ្ជបណ្ឌិតរូបនេះបានសុំសម្រាកមួយភ្លែតសិន ដោយឱ្យគ្រូពេទ្យដទៃវះកាត់ជំនួសមួយភ្លែត ហើយក៏បានរត់ទៅលួចមានអីជាមួយគ្រូពេទ្យស្រីម្នាក់ទៀតនៅក្នុងបន្ទប់វះកាត់ផ្សេងៗ តែចៃដន្យមានអ្នករួមការងារដើរមកឃើញ។
យ៉ាងណាមិញ ក្រោយពីបាត់ខ្លួនទៅអស់ ៨ នាទី វេជ្ជបណ្ឌិតរូបនេះបានត្រឡប់មកបន្តការវះកាត់វិញដោយជោគជ័យ តែចុងក្រោយត្រូវគេចាប់បាន និងចោទប្រកាន់យ៉ាងធ្ងន់ធ្ងរ។ ដោយឡែកវេជ្ជបណ្ឌិតរូបនេះបានសារភាពពីកំហុសរបស់ខ្លួន ដោយបានឱ្យដឹងថាពេលនោះខ្លួនមានការស្មុគស្មាញជាខ្លាំង ព្រោះតែកូនកើតមិនគ្រប់ខែ និងមានបញ្ហាជាមួយនឹងប្រពន្ធ។ វេជ្ជបណ្ឌិតនេះ ក៏បានដាក់ពាក្យមកសុំធ្វើការវិញ ដោយសន្យានឹងមិនប្រព្រឹត្តអំពើបែបនេះទៀតឡើយ៕
ប្រភព៖ Khaosod
