មកទល់ពេលនេះ កម្មវិធីប្រកួតអន្តរជាតិ Miss Universe 2025 ដែលកំពុងដំណើរការនៅប្រទេសថៃ កាន់តែកៀកថ្ងៃប្រកួតវគ្គផ្ដាច់ព្រ័ត្រហើយ ខណៈនៅថ្ងៃទី ១៩ ខែវិច្ឆិកា ឆ្នាំ ២០២៥ នេះ កម្មវិធីឈានដល់វគ្គប្រកួតបឋម ដែលមានវិញ្ញាសា ២ ឱ្យបេក្ខភាពបវរកញ្ញាតំណាងប្រទេសនីមួយៗដើរបង្ហាញសមត្ថភាពក្នុងឈុតរាត្រីសមោសរ និង បង្ហាញឈុតតំណាងជាតិលើឆាកដ៏អស្ចារ្យនេះ។
ស្របពេលនេះដែរ ក្រឡេកមើលបវរកញ្ញាកម្ពុជាយើង អ្នកនាង ហ្វីយ៉ាតា ក៏កំពុងត្រៀមខ្លួនកាន់តែស្វាហាប់ មោះមុត ក្នុងការប្រកួតវគ្គសំខាន់ៗទាំងនេះ ខណៈមហាជនអ្នកគាំទ្រ ក៏ដូចជាអ្នកក្នុងវិស័យបវរកញ្ញាជាច្រើន កំពុងបន្តចែករំលែកបង្ហាញការគាំទ្រលើកទឹកចិត្ត និង ពាក្យជូនពរចំពោះនាងក្នុងដំណើរការប្រកួតវគ្គបន្តបន្ទាប់។
ដោយឡែក អ្វីកាន់តែចាប់អារម្មណ៍ ក្រៅពីមហាជនបង្ហាញការគាំទ្រលើកទឹកចិត្តពីចម្ងាយចំពោះបវរកញ្ញា ហ្វីយ៉ាតា ក៏បានឃើញហ្វេសប៊ុករបស់បវរកញ្ញា អ៊ិន លក្ខិណា បានបង្ហោះសារប្រកាសពីដំណឹងថានាង និង ក្រុមការងារ ត្រៀមចេញទៅកាន់ប្រទេសថៃ ដើម្បីផ្ដល់កម្លាំងចិត្តបវរកញ្ញា ហ្វីយ៉ាតា ដោយផ្ទាល់ក្នុងវគ្គប្រកួតបឋម និង វគ្គប្រកួតផ្ដាច់ព្រ័ត្រទៀតផង។
ក្នុងនោះ កញ្ញា អ៊ិន លក្ខិណា បានបង្ហោះរៀបរាប់លើហ្វេសប៊ុកថា ៖ «ប្អូនស្រី និង ក្រុមការងារបង នឹងទៅគាំទ្រលើកទឹកចិត្តបងស្រី នាថ្ងៃប្រកួតបឋម និង វគ្គផ្ដាច់ព្រ័ត្រ បងស្រីមិនឯកានោះទេ បងស្រីដ៏រឹងមាំ និង ពូកែ ជួបគ្នាឆាប់ៗណាបង បងស្រី និង មិនឯកានោះទេ ប្អូនដឹងថាបងស្រីបានតស៊ូ និង ពុះពាអស់ពីកម្លាំងកាយចិត្តក្នុងវេទិកាប្រកួតមួយនេះ ទោះបានជួបព្យុះភ្លៀងនិង រឿងពិបាកយ៉ាងណា បងបានជូតទឹកភ្នែកចេញហើយបន្តធ្វើវាទៀត ដើម្បីបំពេញបេសកកម្មមួយនេះដែរ បានបង្ហាញថាបងជាស្រ្តីដែររឹងមាំ មានឆន្ទៈ ក្នុងការតំណាងឱ្យប្រទេសកម្ពុជា ទោះជាមានបញ្ហាក៏ដោយ We Love you so much bong … See you very soon soon bong Fiyata – ហ្វីយ៉ាតា»៕
