នៅថ្ងៃទី ២៧ ខែសីហា ឆ្នាំ ២០២៥ នេះ អង្គភាពប្រឆាំងអំពើពុករលួយ បានជូនដំណឹងឱ្យបានដឹងថា នៅវេលាម៉ោង ១០៖៣០ នាទី ព្រឹកថ្ងៃនេះ បេក្ខជនប្រឡងម្នាក់ នៅមណ្ឌលបឋមសិក្សាវត្តស្វាយ ខេត្តសៀមរាប មានបញ្ហាភ្នែកខ្លាំង មិនអាចមើលឃើញច្បាស់ បានស្នើសុំប្រធានមណ្ឌលប្រឡង យកអំពូលភ្លើង និង power bank ផ្ទាល់ខ្លួនចូលបន្ទប់ប្រឡង នៅថ្ងៃទី ២៨-២៩ ខែសីហា ឆ្នាំ ២០២៥ និង ស្នើសុំអនុរក្សអានវិញ្ញាសាឱ្យស្តាប់នៅពេលប្រឡង។
ទាក់ទិនទៅនឹងបញ្ហានេះ ACU ក៏បានបញ្ជាក់ពីចំណាត់ការ ឱ្យបានដឹងថា ប្រធានគណៈមេប្រយោគទូទាំងប្រទេសប្រចាំខេត្តសៀមរាប បានអនុញ្ញាតតាមការស្នើសុំរបស់បេក្ខជន និង បានសម្រេចរៀបចំបន្ទប់សុខភាព សម្រាប់ឱ្យបេក្ខជនប្រឡងដាច់ដោយឡែក។ អង្គភាពប្រឆាំងអំពើពុករលួយ បានកត់សម្គាល់ឱ្យដឹងបន្ថែមផងដែរថា អំពូលភ្លើង និង power bank បានរក្សាទុកនៅស្នាក់ការកណ្តាល៕
