និយាយពីកំលោះរូបសង្ហា ជា រ៉ាយម៉ុន មួយរយៈក្រោយ លោកឆក់បានការចាប់អារម្មណ៍ខ្លាំងពីមហាជនអ្នកគាំទ្រជាច្រើនតាមរយៈអាជីពជាពិធីកររូបសង្ហាដ៏មានសមត្ថភាព ដែលតែងឃើញវត្តមានក្នុងកម្មវិធីតូចធំបន្តបន្ទាប់ ភាគច្រើនជាវេទិកានៃកម្មវិធីប្រកួតបវរកញ្ញាផ្សេងៗ។
ជាក់ស្ដែង តាមរយៈកម្មវិធីប្រកួតសម្រស់ Miss Cosmo Cambodia 2025 ថ្មីៗកន្លងទៅ លោក ជា រ៉ាយម៉ុន ត្រូវបានមហាជនចាប់អារម្មណ៍ និង សរសើរខ្លាំងពីសមត្ថភាពដ៏លេចធ្លោរបស់ពិធីកររូបនេះ ដែលបានបង្ហាញវោហារស័ព្ទយ៉ាងល្អស្ទាត់ជំនាញរហូតដល់ទៅ ៣ ភាសា ទាំងភាសាខ្មែរ អង់គ្លេស និង ចិន។
យ៉ាងណាមិញ មហាជនភាគច្រើនស្គាល់ប្រុសស្អាត រ៉ាយម៉ុន ក្នុងអាជីពជាពិធីករ តែបើក្រឡេកទៅមើល អាជីពដើមរបស់លោកវិញ គឺជាបុរសឯកកម្ពុជាដ៏ស្រស់សង្ហាមួយរូប មានសមត្ថភាព ចំណេះដឹង និង បទពិសោធមិនធម្មតាដែរក្នុងវិស័យបុរសឯកនេះ ដែលលោកធ្លាប់ឆ្លងកាត់ការប្រកួតប្រជែងទាំងឆាកជាតិ និង អន្តរជាតិ។
បើនិយាយពីតំណែងក្នុងវិស័យបុរសឯក លោក ជា រ៉ាយម៉ុន ត្រូវបានគេដឹងថាជាម្ចាស់តំណែង Mister Ocean Cambodia 2021, Mister Glam Cambodia 2022 និង ប្រកួតបានតំណែងអន្តរជាតិ Mister Glam International Humanity 2022 ព្រមទាំងបច្ចុប្បន្ន លោកមានតំណែងជា Mister World Cambodia 2025 ត្រៀមខ្លួនតំណាងកម្ពុជាទៅប្រកួតលើឆាកអន្តរជាតិក្នុងឆ្នាំនេះផងដែរ៕
