ស្រ្តីសមាជិកសភាថៃម្នាក់ ត្រូវគេគំរាមដកចេញពីតំណែង និង រងការរិះគន់ដូចទឹកបាក់ទំនប់ពីពលរដ្ឋថៃរឿង កាន់ជើងខាងកម្ពុជា

ថ្មីៗនេះ លោកស្រី Angkhana Neelaphaijit ដែលជាសមាជិកសភាម្នាក់របស់ថៃ ត្រូវបានមហាជនក្នុងសង្គមថៃនាំគ្នារិះគន់ខ្លាំងសម្បើមណាស់ ព្រោះតែលោកស្រីតែងតែព្យាយាមដាស់តឿនសតិរដ្ឋាភិបាល និងប្រជាជនឱ្យឈប់ប្រើការស្អប់រើសអើងមកដោះស្រាយជាមួយនឹងកម្ពុជា។

ក្នុងនោះដែរ មុននេះលោកស្រី Angkhana បានរិះគន់រដ្ឋាភិបាលថៃ រឿងឱ្យបុគ្គល Influencer ឈ្មោះ Gun Jompalang ចូលមកអុកឡុកចាក់សំឡេងខ្មោចបំភ័យនៅតំបន់ព្រំដែនភូមិព្រៃចាន់ និងភូមិជោគជ័យ។ លោកស្រីបានឱ្យដឹងថា នេះគឺជាការលក់មុខប្រទេសនៅលើឆាកអន្តរជាតិ និងមិនអាចដោះស្រាយអ្វីបានឡើយ ហើយបើសិនជាកម្ពុជាប្រព្រឹត្តអំពើមិនគប្បីមកលើប្រទេសថៃ ប្រទេសថៃក៏អាចមានសិទ្ធិប្តឹងកម្ពុជាវិញបាន ដោយមិនចាំបាច់តបតដោយវិធីទាំងនោះឡើយ។ លោកស្រីសុំឱ្យសង្គមថៃមានសតិ និងកុំបន្តការស្អប់រើសអើងមកលើកម្ពុជា ហើយអះអាងថាកម្ពុជា និងថៃ គឺជាបងប្អូនគ្នា ដែលនឹងត្រូវរកស៊ី និងរស់នៅជាមួយគ្នាតទៀតនៅថ្ងៃអនាគត។

យ៉ាងណាមិញ ក្រោយពីលោកស្រីបានបង្ហាញគំនិតយ៉ាងនេះហើយ មហាជនថៃគ្រប់ជាន់ថ្នាក់បាននាំគ្នាចេញមុខមករិះគន់លោកស្រីមួយទំហឹងតែម្តង ដោយអ្នកខ្លះរួមគ្នាតវ៉ាឱ្យដកលោកស្រីចេញពីសមាជិកសភាទៀត តែលោកស្រីក៏បានតបទៅវិញថា បើសិនជាចង់ដកលោកស្រីមែន គួរតែទៅកែរដ្ឋធម្មនុញ្ញសិន។ មួយវិញទៀត លោកស្រីក៏បានតបទៅកាន់ boom panada ដែលនិយាយឌឺដងឱ្យលោកស្រីចុះទៅកាន់ជាយដែនថា ជាយដែនគឺកន្លែងប្រកាសអាជ្ញាសឹក មិនមែនជាកន្លែងដែលអាចចេញចូលបានតាមចិត្តឡើយ៕

ប្រភព៖ AMARINTV