នៅព្រឹកថ្ងៃទី ២៤ ខែកក្កដា ឆ្នាំ ២០២៥ នេះ ស្របពេលកំពុងមានការផ្ទុះអាវុធនៅតាមព្រំដែន ដែលកងទ័ពថៃបានបាញ់មកខ្មែរមុន និង កងទ័ពខ្មែរកំពុងវាយបកការឈ្លានពានទៅកាន់ភាគីថៃវិញនោះ ឃើញថាប្រជាជនខ្មែរលើបណ្ដាញសង្គមទូទាំងប្រទេស កំពុងបង្ហោះចែករំលែកបង្ហាញការបួងសួងដល់បារមីវត្ថុស័ក្ដិសិទ្ធិ តាមជួយថែរក្សារដល់បងប្អូនកងទ័ពខ្មែរជួរមុខឱ្យមានសុវត្ថិភាពជាបន្តបន្ទាប់។
ដោយឡែកក្រឡេកទៅមើលបណ្តាញសង្គម X (Twitter) ដែលជាបណ្តាញសង្គមគ្របដណ្តប់ទូទាំងពិភពលោក នាពេលនេះកំពុងតែត្រូវបានយុវជនកម្ពុជាបានធ្វើឱ្យអន្តរជាតិឃើញ ពីការឈ្លានពានរបស់ភាគីថៃមកកាន់កម្ពុជាតាមរយៈ Hashtag ចំនួន ៥ ដូចជា៖ «#ថៃជាអ្នកផ្តើមសង្គ្រាម, #ThailandStartedTheWar, #ไทยเป็นผู้เริ่มสงคราม, #JusticeForCambodia, #cambodianeedpeace»។
ពេលនេះដែរ Hashtag ខាងលើកំពុងចែករំលែកយ៉ាងសុសសាយ និង ជាផ្នែកមួយនៃសំឡេងរបស់កម្ពុជា ដែលបង្ហាញអន្តរជាតិថាយើងកំុងត្រូវបានទទួលរងទង្វើឈ្លានពានយោធាយ៉ាងកម្រោល សាហាវ ឃោរឃៅ ពីព្រះរាជាណាចក្រថៃ មកលើអធិបតេយ្យ និង បូរណភាពទឹកដីកម្ពុជា៕
