បើគិតចាប់តាំងពីថ្ងៃចាកចេញពីប្រទេសកម្ពុជា កាលពីល្ងាចថ្ងៃទី ០២ ខែវិច្ឆិកា ឆ្នាំ ២០២៥ រហូតមកដល់ពេលនេះ រយៈពេលប្រមាណជិត ១ សប្តាហ៍ហើយ ដែល ថៃ នារីសុជាតា Miss Universe Cambodia 2025 បានតំណាងឱ្យកម្ពុជាទៅចូលរួមការប្រកួត Miss Universe លើកទី ៧៤។
ក្នុងនោះដែរ វត្តមាននៃការតំណាងឱ្យកម្ពុជានោះ Queen រូបនេះ ពិតជាមិនធ្វើឱ្យអ្នកគាំទ្រខកបំណងនោះឡើយ ពោលគឺ ថៃ នារីសុជាតា បានធ្វើឱ្យអន្តរជាតិបានស្គាល់បវរកញ្ញារបស់កម្ពុជារូបនេះជាហូរហែរ រហូតមានសារព័ត៌មានអន្តរជាតិជាច្រើន បានចុះផ្សាយពីភាពលេចធ្លោ និង សក្តានុពលរបស់នាង។
យ៉ាងណាមិញ ពេលវេលានៃការឡើងទៅកាន់ឆាកប្រកួតកាន់តែមកដល់ ក្រឡកមកមើលអ្នកគាំទ្រ Miss Universe Cambodia 2025 នៅឯក្នុងប្រទេសក៏មិនសំងំស្ងៀមនោះឡើយ ដោយពេលនេះម្នាក់ៗបានស្រុះដៃគ្នា ចំណាយថវិកាផ្ទាល់ខ្លួន ដើម្បីបោះឆ្នោតឱ្យ Queen ថៃ នារីសុជាតា បានចូលដល់ Top កំពូលនៃការប្រកួត Miss Universe 2025៕
