កាលពីថ្ងៃទី ២២ ខែមិថុនា ឆ្នាំ ២០២៥ កន្លងទៅនេះ ក្រសួងសុខាភិបាល រួមគ្នាជាមួយនឹងការិយាល័យប៉ូលិសប្រឆាំងគ្រឿងញៀន ព្រមទាំងការិយាល័យក្រុមប្រឹក្សាត្រួតពិនិត្យគ្រឿងញៀនរបស់ថៃ បានចុះទៅត្រួតពិនិត្យហាងលក់កញ្ឆាចំនួន ២០ ហាងនៅទូទាំងក្រុងបាងកក ដើម្បីរៀបចំឱ្យត្រូវទៅតាមច្បាប់។
ក្នុងនោះអាជ្ញាធរបានរកឃើញហាងចំនួន ៣ កន្លែង បានលួចផលិតចាហួយស្វិតលាយសារធាតុកញ្ឆាទៅចែកចាយលក់ ដោយគ្មានការអនុញ្ញាតិពីក្រសួងសុខាភិបាលសាធារណៈ រួមទាំងរដ្ឋបាលចំណីអាហារ និង ឱសថ (FDA)។ បើទោះជាហាងទាំង ៣ នេះមានអាជ្ញាប័ណ្ណបើកដោយស្របច្បាប់ក៏ដោយ តែចំពោះការលួចផលិតចាយហួយស្វិតនេះ ជាបឋមអាជ្ញាធរបានធ្វើការផ្អាកអាជ្ញាប័ណ្ណរបស់ហាងចំនួន ៧ ថ្ងៃ និង អាចពិន័យជាប្រាក់ចំនួន ៣ ម៉ឺនបាត។
ក្រោយឆែករកឃើញ អាជ្ញាធរបានយកចាហួយខាងលើទៅមន្ទីរពិសោធដើម្បីធ្វើតេស្តពិនិត្យមើល ថាតើវាមានសារធាតុកញ្ឆាលើសពី 2.0 ដែរឬទេ ហើយប្រសិនបើរកឃើញថាលើសកម្រិតកំណត់នោះ គេវិធានការផ្លូវច្បាប់ ដែលត្រូវចាត់ជាបទចោទប្រកាន់មួយទៀតផងដែរ៕
ប្រភព៖ Khaosod
