កាលពីថ្ងៃទី ១០ ខែកញ្ញា ឆ្នាំ ២០២៥ កន្លងទៅ សារព័ត៌មានរបស់ថៃ បានរាយការណ៍ពីករណីបុរសម្នាក់ដែលបែកថ្នាំដើរដុតផ្ទះ ដុតឡានអ្នកជិតខាង ដោយសារតែមិនសុខចិត្តគេចោទថាបានជក់ថ្នាំញៀន។
តាមព័ត៌មានបានឱ្យដឹងថា បុរសខាងលើនេះមានវ័យ ៤៤ ឆ្នាំ ជាអ្នករស់នៅឃុំណាក្វាង ស្រុកមឿង ខេត្តអ៊ុដនថានី។ នៅថ្ងៃកើតហេតុ បុរសរូបនេះបានដុតផ្ទះ រួមទាំងឡានរបស់ស្រ្តីជាគ្រូពេទ្យម្នាក់ ហើយក៏បន្តទៅដុតកន្លែងលក់ដូររបស់អ្នកភូមិម្នាក់ទៀត ដែលរស់នៅក្នុងភូមិជាមួយខ្លួន បង្កឱ្យខូចខាតអស់ទឹកប្រាក់ជាង ២ លានបាត។
ក្នុងនោះ បន្ទាប់ពីបង្កហេតុរួច បុរសរូបនេះព្យាយាមលួចម៉ូតូអ្នកភូមិដើម្បីរត់គេច តែក៏ត្រូវគេឃាត់ខ្លួនបាន និងបញ្ជូនទៅឱ្យប៉ូលិស។ ដោយឡែក បុរសនេះបានសារភាពថាស្រ្តីជាគ្រូពេទ្យបានចោទថាខ្លួនជក់គ្រឿងញៀន ទាំងដែលខ្លួនឈប់ជក់ទៅហើយ ទើបកើតការខឹងសម្បា ហើយក៏បានទៅដុតទ្រព្យសម្បត្តិរបស់នាងចោល។ បុរសនេះបានបន្តទៀតថា ចំណែកអ្នកលក់ដូរនោះវិញ ធ្លាប់ជួលមនុស្សឱ្យមកសម្លាប់ខ្លួន ទើបសងសឹកវិញដោយការដុតកន្លែងលក់ដូរគេចោលបែបនេះ៕
ប្រភព៖ Khaosod
