នៅថ្ងៃទី ១៨ ខែកុម្ភៈ ឆ្នាំ ២០២៥ មន្ទីរពេទ្យមិត្តភាពខ្មែរ-សូវៀត បានជូនដំណឹងឱ្យបានដឹងថា ខាងមន្ទីរពេទ្យបានសហការជាមួយក្រុមគ្រូពេទ្យមកពីប្រទេសអូស្ត្រាលី ដើម្បីធ្វើការវះកាត់ជំងឺរោគស្រ្តី ជូនស្រ្តីដែលមានវិបត្តិ ចាប់ពីថ្ងៃទី ២០ ដល់ថ្ងៃទី ២៥ ខែមេសា ឆ្នាំ ២០២៥។
ចំពោះការពិនិត្យមានដូចជា ៖
១. ការពិគ្រោះជំងឺរោគស្ត្រី
– ពិគ្រោះលំបាកមានកូន
– ពិគ្រោះស្រ្តីរលូតកូនម្តងហើយម្តងទៀត
– ពិគ្រោះគភ៌មានហានិភ័យខ្ពស់ វេជ្ជសាស្ត្រមាតា និង ទារកក្នុងផ្ទៃ ដូចជាស្ត្រីដែលមានគភ៌មិនប្រក្រតី ស្ត្រីដែលមានកូនភ្លោះ ស្ត្រីមានកត្តាប្រឈមខ្ពស់ កូនក្នុងផ្ទៃដែលមានការលូតលាស់យឺត កូនក្នុងផ្ទៃដែលមានបេះដូងមិនប្រក្រតី ការវិវត្តអវៈយវៈមិនប្រក្រតីរបស់កូនក្នុងផ្ទៃ និង ពិគ្រោះជំងឺស្រុតសរីរាង្គ។
២. ការវះកាត់រោគស្ត្រី
– ជំងឺរោគស្ត្រី ដុំសាច់ស្បូន ដុំដៃស្បូន
– ជំងឺស្បូនព្រែក ស្បូនមានសន្ទះខាន់ ស្បូនស្អិត មិនមករដូវ
– ជំងឺលំបាកមានកូនដែលមានលក្ខខណ្ឌតម្រូវការវះកាត់ ការវះកាត់ដោយចោះម៉ាស៊ីនអង់ដូស្កូប
– ជំងឺស្រុតសរីរាង្គ ដូចជាស្រុតស្បូន ស្រុតប្លោកនោម ស្រុតទ្វារលាមក ជំងឺហៀរទឹកនោមតាមទ្វារមាស ជំងឺហៀរលាមកតាមទ្វារមាស ជំងឺមិនមានទា្វរមាសពីកំណើត ជំងឺប្រដាប់ភេទលូតលាស់មិនប្រក្រតីពីកំណើត។
អាស្រ័យហេតុនេះ សាធារណជនដែលមានបញ្ហាខាងលើ អាចទំនាក់ទំនងចុះឈ្មោះសម្រាប់អ្នកជំងឺ ចាប់ពីថ្ងៃផ្សាយដំណឹងនេះតទៅ រហូតដល់ថ្ងៃទី ២១ ខែមេសា ឆ្នាំ ២០២៥ នៅផ្នែកសម្ភព និង រោគស្រ្តី ឬ តាមរយៈលេខទូរស័ព្ទ 087 701 373៕
សូមអានសេចក្ដីលម្អិតនៅខាងក្រោម ៖
