មហាជនអ្នកប្រើប្រាស់បណ្ដាញសង្គម បាននាំគ្នាចែករំលែកបន្តគ្នាព្រោងព្រាត បន្ទាប់ពីមាននារីម្នាក់បានបង្ហោះសារចែករំលែកទៅកាន់មិត្តនារីៗ ឱ្យឧស្សាហ៍តាមដានបញ្ហាលើរាងកាយ ចៀសវាងមានបញ្ហា ពិសេសនោះគឺបញ្ហាដុំសាច់ ឬ ដុំគីស ដែលនាងបានជួបប្រទះផ្ទាល់តែម្ដង។
ទាក់ទិនទៅនឹងរឿងនេះ ស្ត្រីដែលមានគណនីហ្វេសប៊ុកឈ្មោះ រី ធីតា បានបង្ហោះរូបភាពភ្ជាប់ជាមួយសារនៅថ្ងៃទី ២៣ ខែមីនា ឆ្នាំ ២០២៥ ឱ្យបានដឹងថា កាលពីថ្ងៃទី ២៣ ខែមីនា ឆ្នាំ ២០២០ បងស្រីរបស់ខ្លួន បានស្លាប់ដោយសារជំងឺដុំគីស ខណៈនៅថ្ងៃទី ២៣ ខែមីនា ឆ្នាំ ២០២៥ ថ្មីៗនេះ ស្រាប់តែនាងផ្ទាល់បានពិនិត្យឃើញជំងឺនេះម្ដង។
តាមប្រភពដដែលបានបន្តថា ៖ «វាជារឿងផ្ទាល់ខ្លួន តែចង់ចែករំលែកមិត្តៗនារីបានដឹង ត្រូវចេះតាមដានបញ្ហាលើរាងកាយ ឧស្សាហ៍ឱ្យពេទ្យពិនិត្យ ៦ ទៅ ១០ ខែម្ដង កុំខ្មាសពេទ្យដូចខ្ញុំ ហើយអាចមើលខ្ញុំជាគំរូបាន ចេញតែលទ្ធផលមក និយាយអីលេងចេញហើយ មិនមែន ១ មិនមែន ២ តែមកម្ដង ៣ ដុំ តែម្ដង។ ការពារប្រសើរជាងព្យាបាល ដុំសាច់ក្នុងសុដន់»៕
