ចង់បានថ្ងៃការល្អ ពឹង Chat GPT ដេញពេលាឱ្យ ដេញបានភ្លាមវឹងទៅកក់ចុងភៅ ភ្នួង អាចារ្យ ដល់កៀកថ្ងៃបើកប្រតិទិនមើល បញ្ឈរភ្នែកឆ្កឹង

ថ្មីៗនេះ នារីជនជាតិតៃវ៉ាន់ម្នាក់ បានទម្លាយបទពិសោធរឿងឱ្យ Chat GPT ជួយរកពេលាថ្ងៃរៀបការឱ្យ ស្រាប់តែរកប៉ះចំថ្ងៃអពមង្គល មានអីខឹងពេកឈ្លោះជាមួយ Chat GPT មួយទំហឹង។

នារីរូបនេះបានរៀបរាប់ឱ្យដឹងថា នាងបានយកថ្ងៃខែកំណើតរបស់ខ្លួន និង គូដណ្តឹង ព្រមទាំងឆ្នាំរបស់ឪពុកម្តាយទាំងសងខាង ឱ្យទៅ Chat GPT ជួយរកពេលាថ្ងៃរៀបការល្អបំផុតឱ្យ។ ថ្ងៃដែលរើសបាន គឺជាថ្ងៃទី ៦ ខែមិថុនា ឆ្នាំ ២០២៦ ហើយនាងក៏បានរៀបចំគ្រប់យ៉ាងរួចរាល់ រង់ចាំតែថ្ងៃចូលរោងការប៉ុណ្ណោះ ប៉ុន្តែអ្វីដែលគួរឱ្យហួសចិត្ត ស្រាប់តែម្តាយនាងបើកប្រក្រតីទិនចិនឃើញថា ថ្ងៃដែល Chat GPT រើសឱ្យនោះ គឺជាអពមង្គល ដែលហាមមិនឱ្យមានការរៀបការដាច់ខាត។

យ៉ាងណាមិញ នាងពិតជាខកចិត្តណាស់ នាងចោទថា Chat GPT ធ្វើឱ្យមង្គលការនាងត្រូវផ្លាស់ប្តូរទាំងអស់ ហើយនាងក៏បានឈ្លោះជាមួយវាយ៉ាងខ្លាំងទៀតផង​ តែក៏ជាសំណាងល្អដែលនាងដឹងទាន់ពេល កុំអីពិធីរៀបការរបស់នាងនឹងខ្ទេចខ្ទីដោយសារវាមិនខាន។ ដោយឡែក មហាជនជាច្រើនមានការហួសចិត្តចំពោះនារីរូបនេះ អ្នកខ្លះក៏ឆ្លៀតដៀលនាងថា ខ្លួននាងទេដែលល្ងង់ទៅប្រើវាមកឱ្យរើសថ្ងៃសំខាន់ក្នុងជីវិត ដោយមិនគិតរកគ្រូខាងក្រៅ៕

ប្រភព៖ Sanook