ស្រឡាញ់មើលចិត្តគ្នាច្រើនឆ្នាំ! ពេលនេះ អ៊ីវ៉ា និង គូស្នេហ៍ ដឹកដៃគ្នាទៅសំអាងការរើសឈុតត្រៀមថ្ងៃពិសេសហើយ

ពិតណាស់ កន្លងមកក្រៅពីជីវិតលើវិស័យសិល្បៈ តារាចម្រៀងស្រី អ៊ីវ៉ា ក៏តែងធ្វើឱ្យមហាជនអ្នកគាំទ្រលើបណ្ដាញសង្គមចាប់អារម្មណ៍តាមដានលើរឿងរ៉ាវស្នេហារបស់នាងដែរ ដោយមកដល់ពេលនេះ រយៈពេល ៣ ឆ្នាំហើយដែលនាងបានបើកបង្ហាញពីទំនាក់ទំនងស្នេហាជាមួយគូស្នេហ៍រូបសង្ហាឈ្មោះ លី សេងហួរ ក្រោយពីផ្ដើមស្នេហ៍ Private ច្រើនហើយនោះ។

ក្រោយបើកបង្ហាញចំណងស្នេហ៍ជាសាធារណៈប៉ុន្មានឆ្នាំមកនេះ កញ្ញា អ៊ីវ៉ា និង គូស្នេហ៍ បានចាប់ដៃគ្នារៀបចំជីវិតគូ និង បន្តមើលចិត្តគ្នាពេញដោយភាពផ្អែមល្ហែម ព្រមទាំងធ្វើការរកស៊ីកាន់កាប់មុខជំនួញរៀងៗខ្លួន ខណៈមហាជនក៏កំពុងរង់ចាំមើលអ្នកទាំងពីរ រើសពេលវេលាល្អចូលរោងការផងដែរ។

ដោយឡែក មកដល់ថ្មីៗនេះ ក្រោយស្រឡាញ់មើលចិត្តគ្នាជាច្រើនឆ្នាំ តារាចម្រៀងស្រី អ៊ីវ៉ា និង គូស្នេហ៍រូបសង្ហា កំពុងធ្វើឱ្យមហាជនអ្នកគាំទ្របង្ហាញការអបអរ និង រំភើបជំនួស ខណៈបានឃើញនាង និង គូស្នេហ៍ បង្ហោះរូបភាពនៅសំអាងការ ដែលអ្នកទាំងពីរបានដឹកដៃគ្នាទៅរើសឈុតប្រពៃណីកូនក្រមុំកូនកំលោះ ដោយអាចនឹងកំពុងត្រៀមចូលរោងការឆាប់ៗខាងមុខនេះ៕