ស្រស់ស្អាត ទឹកចិត្តក៏ប្រពៃ! ជំទាវអ្នកឧកញ៉ា គួន ធីតា ជាធុរជនដ៏ឆ្នើម រមែងសកម្មក្នុងការងារសង្គម និង សប្បុរសធម៌

រូបសម្រស់ក្មេងវ័យ ជំទាវអ្នកឧកញ៉ា គួន ធីតា ត្រូវបានគេស្គាល់ថា ជាធុរជនដ៏ឆ្នើម ដែលរមែងសកម្មក្នុងការងារសង្គម និង សប្បុរសធម៌។ បច្ចុប្បន្ន ជំទាវអ្នកឧកញ៉ា គួន ធីតា គឺជាសមាជិកក្រុមប្រឹក្សាភិបាល នៃសមាគមឧកញ៉ាកម្ពុជា និង ជាស្ថាបនិក និង ប្រធានក្រុមប្រឹក្សាភិបាល នៃក្រុមហ៊ុន អរៀនដាអ៊ិនធើណេសិនណល ហសភីថល ឯ.ក. (Orienda International Hospital Co., Ltd.) ដែលជាស្ថាប័នសុខាភិបាលឯកជនមួយ ផ្តល់នូវសេវាកម្មផ្នែកវេជ្ជសាស្ត្រឈានមុខគេនៅក្នុងព្រះរាជាណាចក្រកម្ពុជា។

ក្រៅពីនេះ ជំទាវអ្នកឧកញ៉ា ក៏ធ្វើការវិនិយោគលើវិស័យនានា រួមមាន ហិរញ្ញវត្ថុ ធានារ៉ាប់រង សណ្ឋាគារ និង ទេសចរណ៍ និង សេវាកម្មច្បាប់ ដោយផ្ដល់ការងារដល់បុគ្គលិករាប់ពាន់នាក់ ដែលបានរួមចំណែកបង្កើតការងារជាច្រើនជូនប្រជាពលរដ្ឋក្នុងសង្គម។

ជំទាវអ្នកឧកញ៉ា គឺជាធុរជនពោរពេញដោយបទពិសោធ និង វិជ្ជាជីវៈខ្ពស់ ដែលអាចប្រើប្រាស់ភាសាខ្មែរ អង់គ្លេស និង ចិន និង បានបញ្ចប់ការសិក្សាកម្រិតអនុបណ្ឌិតផ្នែកហិរញ្ញវត្ថុផងដែរ។ ក្រៅពីការងារធុរកិច្ច នាពេលកន្លងមក ជំទាវអ្នកឧកញ៉ាបានចូលរួមចំណែកយ៉ាងសកម្ម និង សន្ធឹកសន្ធាប់ទាំងក្នុងការងារសង្គម និង សប្បុរសធម៌នានា រួមមាន៖ ចូលរួមជាមួយសមាគមឧកញ៉ាកម្ពុជា ក្នុងសកម្មភាពសប្បុរិសធម៌ដល់មណ្ឌលកុមារកំព្រាចំនួន ៤ នៅខេត្តកំពង់ស្ពឺ និង ចែកអំណោយជូនសិស្សានុសិស្សនៅអនុវិទ្យាល័យស្ទឹងជ្រៅ សង្កាត់ដើមមៀន ក្រុងតាខ្មៅ ខេត្តកណ្តាល, ចូលរួមបរិច្ចាគឈាម និង ដឹកនាំវេជ្ជបណ្ឌិត បុគ្គលិក និង សមាជិកនៃមន្ទីរពេទ្យអន្តរជាតិអរៀនដាធ្វើការបរិច្ចាគឈាម ជូនដល់មជ្ឈមណ្ឌលជាតិផ្តល់ឈាម ចូលរួមសកម្មភាព និង ឧបត្ថម្ភដល់ក្រុមគ្រូពេទ្យស្ម័គ្រចិត្តនៃសម្ព័ន្ធគ្រូពេទ្យសហភាពសហព័ន្ធយុវជនកម្ពុជា, ចូលរួមសកម្មភាព និង ឧបត្ថម្ភដល់ការលើកតម្កើង និងការពារកុមារី ដែលងាយរងគ្រោះ នៃអង្គការ អាហ្វេ ស៊ីប ក៏ដូចជាបរិច្ចាគជូនកាកបាទក្រហមកម្ពុជា រួមទាំងសកម្មភាពមនុស្សធម៌ជាច្រើនទៀត។

ជំទាវអ្នកឧកញ៉ាត្រូវបានរាជរដ្ឋាភិបាលកម្ពុជាទទួលស្គាល់ និង ផ្តល់កិត្តិយសតាមរយៈគ្រឿងឥស្សរិយយសជាច្រើន ជាពិសេសគ្រឿងឥស្សរិយយសថ្នាក់កំពូល «ជាតូបការ» ដែលប្រោសព្រះរាជទានដោយព្រះមហាក្សត្រ នៃព្រះរាជាណាចក្រកម្ពុជាផងដែរ៕