ស្រលាញ់គ្នា ៤ ឆ្នាំ ស្បថហាមថើបគ្នា ព្រោះខ្លាចរោលរាល ទុកចាំសម្ពោធនៅថ្ងៃរៀបការ ទីបំផុតលទ្ធផលហួសស្មាន

គូស្នេហ៍មួយគូរស់នៅរដ្ឋតិចសាស់ សហរដ្ឋអាមេរិក បានស្រលាញ់គ្នាអស់រយៈពេល ៤ ឆ្នំា។ មិនថាក្តីស្នេហ៍ជ្រាលជ្រៅប៉ុនណា ពួកគេប្រកាន់ខ្ជាប់ការមិនប៉ះពាល់រាងកាយ ជាពិសេស ស្នាមថើប ដោយត្រូវរក្សាទុករហូតដល់ថ្ងៃរៀបការទើបសម្ពោធ។​

គូស្នេហ៍វ័យ ២០ ឆ្នាំស្តើងនេះ ខាងស្រីឈ្មោះ Kaytlin និង ខាងប្រុសឈ្មោះ Drew Brown ពួកគេបានចាប់ផ្តើមទាក់ទងគ្នានៅដើមឆ្នាំ ២០២១។ កាន់គ្រិស្តសាសនាដូចគ្នា ពួកគេបានសម្រេចចិត្តថា នឹងមិនប៉ះពាល់គ្នារហូតដល់ថ្ងៃរៀបការ ថ្វីបើភាសាស្នេហ៍របស់ពួកគេ (love language) គឺជាការប៉ះពាល់រាងកាយ (physical touch) ក៏ដោយ។

ដៃគូខាងស្រី ដែលមានអាយុទើប​ ២២ ឆ្នាំ បានលើកឡើងថា នាង និង ដៃគូ មិនព្រមថើបគ្នា ព្រោះវាអាចធ្វើឱ្យពួកគេមានអារម្មណ៍ស្និទ្ធស្នាល ឬ រហូតរោលរាលចង់រួមដំណេក។ ដូច្នេះពួកគេបានស្បថថា មិនត្រូវថើបគ្នាមុនថ្ងៃពិសេសឡើយ។ ជៀសវាងជ្រុលជ្រួសផងនោះ ពួកគេដាច់ខាតមិននៅផ្ទះតែពីរនាក់ ឬ ទៅកន្លែងណាស្ងាត់តែពីរនាក់ សុខចិត្តទាក់ទងបែបគ្មានភាពរ៉ូមែនទិក។​

ស្រលាញ់គ្នាបាន ៤ ឆ្នាំ ទីបំផុតពួកគេពិតជាអាច​រក្សាបានអ្វីគ្រប់យ៉ាងដូចការស្បថមែន។  ពួកគេទើបបានរៀបអាពាហ៍ពិពាហ៍កាលពីដើមខែតុលានេះ ហើយស្នាមថើបដំបូងនៅថ្ងៃរៀបការ វាពិតជាធ្វើឱ្យពួកគេមានអារម្មណ៍អស្ចារ្យបំផុត៕

ប្រភព៖ NYP