ស្រលាញ់គ្នាមិនខ្វល់ពីកម្ពស់! ខាងស្រីកម្ពស់ ២ ម៉ែត្រ ឯខាងប្រុសត្រឹមជាង ១ ម៉ែត្រ ទោះត្រូវគេរិះគន់ តែក្តីសុខពេញទី

រាល់ដងច្រើនតែគេនិយាយពីស្នេហាមិនគិតពីអាយុ តែគូស្នេហ៍មួយគូនេះវិញ គឺស្រលាញ់គ្នាមិនគិតពីកម្ពស់ ដែលខាងស្រីមានកម្ពស់ដល់ទៅ ២,២ ម៉ែត្រ ចំណែកឯខាងប្រុស កម្ពស់ត្រឹម ១, ៦២ ម៉ែត្រ។

នាង Elisany da Cruz Silva ជនជាតិប្រេស៊ីល ត្រូវបានគេស្គាល់ជា influencer ដ៏មានប្រជាប្រិយភាព។ នាងបានកើតមកជាមួយស្ថានភាពឆ្អឹងរីកធំខុសប្រក្រតី ហៅថា gigantism ដែលធ្វើឱ្យនាងលូតកម្ពស់ខ្ពស់ខ្លាំងខុសពីធម្មតា។  កាលពីប្រាំបីឆ្នាំមុន ដោយសាររាងខ្ពស់ជ្រុល ហាក់ធ្វើឱ្យនាងពិបាករកគូស្នេហ៍ តែទីបំផុតនាងបានជួបបុរសម្នាក់ឈ្មោះ Francinaldo da Silva Carvalho មានកម្ពស់ទាបជាង ដែលបុរសនេះបានចាប់ចិត្តលើនាងភ្លាមៗ ហើយក៏ទាក់ទងគ្នាតែម្តង។

តាមរយៈបទសម្ភាសមួយនៅលើ YouTube  បុរសកម្ពស់ ១, ៦២ ម៉ែត្រ Francinaldo បាននិយាយថា ដៃគូរបស់លោកនាងពិតជាស្រស់ស្អាត ទោះនាងខ្ពស់ខ្លាំង តែនាង គួរឱ្យស្រលាញ់ មុខនាងស្អាតណាស់។

ទាកទងគ្នាបានពីរឆ្នាំ អ្នកទាំងពីរបានសម្រេចចិត្តរៀបការ ហើយទទួលបានចំណងដៃកូនប្រុសម្នាក់ឈ្មោះ Angelo ដែលឥលូវនេះមានអាយុ ៣ ឆ្នាំហើយ។ ពិតមែនទៅ ពីដំបូង នាងមានផ្ទៃពោះម្តងរួចមកហើយ ពពោះជាកូនភ្លោះទៀត តែជាអកុសល ក៏រលូតទៅវិញ ដោយសារស្ថានភាពសុខភាពពាក់ព័ន្ធនឹងកម្ពស់នេះឯង។

ស្នេហាមិនគិតពីកម្ពស់ អាចគិតថាមានសុភមង្គល តែជារឿយៗ គូស្នេហ៍មួយគូនេះ តែងប្រឈមការវិនិច្ឆយ ការពេបជ្រាយ និង ការរិះគន់មិនចេះចប់ មិនចេះហើយ ទាំងនៅលើបណ្តាញសង្គម និង ជីវិតប្រចាំថ្ងៃ។ រយៈកាលដំបូង ពួកគេហាក់យកដាក់ខ្លួនច្រើនពេក រហូតកើតជំងឺថប់បារម្ភ តែយូរៗទៅ អ្នកទាំងពីរសម្រេចចិត្តថាលែងខ្វល់ ងាកមកខ្វល់តែជីវិតប្តីប្រពន្ធ។

ដោយមានកម្ពស់ខ្ពស់ បច្ចុប្បន្ន នាង Elisany da Cruz Silva បានកំពុងកាក់កបនឹងអាជីពម៉ូឌែល ហើយស្វាមីរបស់នាងក៏រំពឹងដែរថា អាជីពមួយនេះ នឹងជួយឱ្យជីវភាពគ្រួសារល្អប្រសើរ អាចមានលទ្ធភាពផ្តល់អនាគតល្អដល់កូន៕

ប្រភព៖ NYP