មរណភាពនៃតារាសម្តែងប្រុស និង Freshie Boy ចំណាត់ថ្នាក់លេខ ១ ជំនាន់ទី ៨ ឆ្នាំ ២០០៩ លោក ប៉ែន ចាន់សិទ្ធិ កាលពីថ្ងៃទី ០៣ ខែមីនា ឆ្នាំ ២០២៥ កន្លងទៅ បានធ្វើឱ្យមហាជន អ្នកគាំទ្រ និង មិត្តទាំក្នុង ក្រៅសិល្បៈជាច្រើនមានក្តីរន្ធត់ចិត្តយ៉ាងខ្លាំង ក៏ព្រោះតែលោកហាក់លាទៅលឿនពេកទាំងវ័យក្មេង។
លើសពីនោះទៀតដែរ មហាជន អ្នកគាំទ្រ ក៏កាន់តែស្លុតចិត្ត ក៏ព្រោះមុនទទួលមរណភាព លោក ប៉ែន ចាន់សិទ្ធិ ក៏មិនដែលបង្ហាញពីស្ថានភាពជំងឺជាសាធារណនោះឡើយ ពោលគឺអំឡុងពេលលោកឈឺ លោកក៏នៅតែបន្តការងារ ដោយគ្មានអ្នកណាថាលោកឈឺនោះទេ។ ក្នុងនោះ មហាជន អ្នកគាំទ្រ និង មិត្តទាំងក្នុង ក្រៅសិល្បជាច្រើន ក៏បានចូលរួមរំលែកទុក្ខ និង ចូលរួមបុណ្យសពរបស់លោក ប៉ែន ចាន់សិទ្ធិ ជាបន្តបន្ទាប់ផងដែរ។
នៅព្រឹកថ្ងៃទី ០៥ ខែមីនា ឆ្នាំ ២០២៥ នេះ រាងកាយរបស់លោក ប៉ែន ចាន់សិទ្ធិ នឹងលាឆ្ងាយពីអ្នករាល់គ្នារហូតហើយ ដោយក្រុមគ្រួសាររបស់តារាប្រុសរូបនេះ បានជម្រាបជូនថា សពលោក ប៉ែន ចាន់សិទ្ធិ បានបូជានៅព្រឹកវេលាម៉ោង ៨ និង ៣០ នាទី។
តាមរយៈការបង្ហោះជូនដំណឹងពីក្រុមគ្រួសារលោក ប៉ែន ចាន់សិទ្ធិ បានជម្រាបថា៖ «យើងខ្ញុំ ជាសាច់ញាតិនៃសព លោក ប៉ែន ចាន់សិទ្ធិ គាត់បានទទួលមរណភាព នៅវេលាម៉ោង ១៣:២០ នាទី ថ្ងៃទី ០៣ ខែ មីនា ឆ្នាំ ២០២៥ ដោយ (រោគាពាធ)។ ដោយពិធីបុណ្យប្រារព្ធឡើងនៅទីតាំងវត្ត តាំងក្រសាំងខាងជើង។ យើងខ្ញុំសូមគោរពអញ្ជើញដល់ បងប្អូន សាច់ញាតិ និង មិត្តភក្កិនៃសព ជិតឆ្ងាយ ចូលរួមកម្មវិធីបុណ្យនៅ ថ្ងៃទី ០៤ ខែ មីនា ឆ្នាំ ២០២៥។ សពលោក ប៉ែន ចាន់សិទ្ធិ នឹងបូជានៅព្រឹក ថ្ងៃទី ៥ ខែ មីនា ឆ្នាំ ២០២៥ វេលាម៉ោង ០៨ និង ៣០ នាទីព្រឹក។ សូមអធ្យាស្រ័យពីការជូនដំណឹង ដោយពុំបានជម្រាបផ្ទាល់ពីក្រុមគ្រួសារនៃសពយើងខ្ញុំ »៕
