REVIVRE STUDIO គឺជាប្រ៊េនសម្លៀកបំពាក់ដ៏មានប្រជាប្រិយភាពក្នុងវិស័យហ្វេហ្សិននៅកម្ពុជា។ ប្រ៊េននេះត្រូវបានបង្កើតឡើងដោយស្ថាបនិក Tifanny ឬ មានឈ្មោះពេញថា Tifanny Bophadavy Doche នាងជាកូនខ្មែរកាត់ចិន ដែលកើត និង ធំធាត់នៅបារាំង ហើយបច្ចុប្បន្នកំពុងដឹកនាំម៉ាកយីហោនេះនៅកម្ពុជា។
ជាមួយស្នាដៃលេចធ្លោនៅក្នុងជំនួញ នាយកច្នៃប្រតិដ្ឋប្រចាំម៉ាក REVIVRE STUDIO ត្រូវបានទស្សនាវដ្តីហ្វេហ្សិនដ៏ល្បី Vogue ហ្វីលីពីន ចុះផ្សាយអំពីដំណើររបស់នាងក្នុងការកសាងម៉ាកយីហោមួយនេះ។ ជាក់ស្តែង នាងត្រូវបានទស្សនាវដ្តីចុះផ្សាយលេខប្រចាំខែ កញ្ញា ឆ្នាំ ២០២៥ ក្រោមចំណងជើង “Once On This Island – A Tribute to Creative Communities”។
ជាចំណែកមួយនៅក្នុងប្រធានបទ The New Guard គេបានសរសេរអំពី ការអបអរសាទរអ្នករចនាម៉ូដចំនួនប្រាំពីររូប ដែលបានបង្កើតអនាគតនៃម៉ូដសម្លៀកបំពាក់អាស៊ីអាគ្នេយ៍។ ហើយសម្លៀកបំពាក់ដែលច្នៃឡើងដោយ Tifanny ក៏ត្រូវបានដាក់រូបភាពបង្ហាញផងដែរ។ការទទួលស្គាល់ដោយទស្សនាវដ្តី Vogue គឺជាជំហានដ៏សំខាន់មួយសម្រាប់វិស័យច្នៃប្រឌិតរបស់កម្ពុជា និង ជាការរម្លឹកថា សិប្បកម្ម និរន្តរភាព និង អត្តសញ្ញាណអាចរួមរស់ជាមួយគ្នាដោយមោទកភាព។
គួរឱ្យដឹងដែរថា Tifanny បានបញ្ចប់ការសិក្សានៅសាលាហ្វេហ្សិន Esmod Fashion Design & Business School នៅប្រទេសបារាំង។ នាងបានធ្វើការឱ្យម៉ាកហ្វេហ្សិនដ៏ល្បី Viktor & Rolf នៅ Amsterdam រាជធានីនៃហូឡង់ និង កន្លែងមួយចំនួនទៀតនៅទីក្រុងប៉ារីសអស់រយៈពេល ៣ ឆ្នាំ មុនពេលបើកម៉ាកយីហោជារបស់ខ្លួន៕
