ស្ថានការណ៍រសៀលនេះ ការប្រយុទ្ធគ្នា រវាងកងទ័ពកម្ពុជា-ថៃ កំពុងបន្តនៅឡើយ ខណៈកម្ពុជា បន្តគ្រប់គ្រងប្រាសាទតាមាន់ និង តាក្របី

នៅថ្ងៃទី ២៤ ខែកក្កដា ឆ្នាំ ២០២៥ នេះ សារព័ត៌មានក្នុងស្រុក បានបញ្ជាក់ឱ្យបានដឹងថា រហូតដល់រសៀលថ្ងៃទី ២៤ ខែកក្កដា ឆ្នាំ ២០២៥ នេះ ការប្រយុទ្ធគ្នារវាងកងទ័ពកម្ពុជា និង កងទ័ពថៃ នៅតែបន្តនៅឡើយ នៅតាមបណ្តោយព្រំដែនប្រទេសទាំងពីរ។

ក្នុងនោះបើតាមសេចក្តីរាយការណ៍ពីកងទ័ពជួរមុខ បានឱ្យដឹងថា ខណៈនេះដែរ កម្ពុជាបន្តគ្រប់គ្រងទាំងស្រុងនៅប្រាសាទតាមាន់ និង តាក្របី បន្ទាប់ពីវាយបណ្តេញកងទ័ពថៃឱ្យដកថយ។

គួរឱ្យដឹងផងដែរថា នៅព្រឹកនេះ លោកជំទាវ ម៉ាលី សុជាតា អ្នកនាំពាក្យក្រសួងការពារជាតិ បានជូនដំណឹងឱ្យបានដឹងថា នៅព្រឹកថ្ងៃទី ២៤ ខែកក្កដា មានការផ្ទុះអាវុធវាយប្រហារគ្នារវាងកងទ័ពកម្ពុជា និង កងទ័ពថៃ នៅតាមបណ្តោយព្រំដែនកម្ពុជាថៃក្នុងភូមិសាស្ត្រខេត្តឧត្តរមានជ័យ។ អ្នកនាំពាក្យក្រសួងការពារជាតិ បានបញ្ជាក់ឱ្យដឹងច្បាស់ៗថា កងទ័ពថៃ បានបើកការបាញ់ប្រហារមកលើកងទ័ពកម្ពុជាមុន ទើបកងទ័ពកម្ពុជា បានប្រើប្រាស់សិទ្ធិការពារខ្លួនក្នុងអធិបតេយ្យ និង បូរណភាពទឹកដីរបស់ខ្លួន ប្រឆាំងនឹងការឈ្លានពានរបស់កងទ័ពថៃ ដែលបានបំពានលើបូរណភាពទឹកដីកម្ពុជា៕

ប្រភព ៖ Fresh News