នៅព្រឹកថ្ងៃទី ២៤ ខែកក្កដា ឆ្នាំ ២០២៥ នេះ តាមប្រភពព័ត៌មានបឋមបានឱ្យដឹងថា នៅព្រឹកនេះ កងទ័ពកម្ពុជាបានធ្វើការវាយបកទៅលើកងទ័ពឈ្លានពានថៃ ដែលបាញ់ប្រហារមកលើកម្ពុជាមុន និង បានបិទប្រាសាទតាមាន់ធំមិនឱ្យប្រជាជនចូល ដែលពេលនេះកងទ័ពកម្ពុជាអាចគ្រប់គ្រងសមរភូមិប្រយុទ្ធ និង បាញ់តបតសត្រូវយ៉ាងចាស់ដៃ តាមរយៈគ្រាប់បាញ់ ៤០ កាណុង បាញ់ស្រោចដូចទឹកភ្លៀង។
ក្នុងនោះ តាមរយៈសេចក្តីរាយការណ៍ពីកម្លាំងទាហានជួរមុខ នៅព្រឹកថ្ងៃទី ២៤ ខែកក្កដា ឆ្នាំ ២០២៥ នេះ បានបញ្ជាក់ថា ការផ្ទុះអាវុធបានកើតឡើងនៅប្រាសាទតាមាន់ ប្រាសាទតាក្របី និង ថ្មដូន ក្នុងខេត្តឧត្តរមានជ័យ ហើយបន្តផ្ទុះដល់ភ្នំខ្មោច បុស្បូវ ជាំតែ និង តំបន់បី ក្នុងខេត្តព្រះវិហារ។
គួរឱ្យដឹងផងដែរថា អ្នកនាំពាក្យក្រសួងការពារជាតិ បានបញ្ជាក់ឱ្យដឹងច្បាស់ៗថា កងទ័ពថៃ បានបើកការបាញ់ប្រហារមកលើកងទ័ពកម្ពុជាមុន ទើបកងទ័ពកម្ពុជា បានប្រើប្រាស់សិទ្ធិការពារខ្លួនក្នុងអធិបតេយ្យ និង បូរណភាពទឹកដីរបស់ខ្លួន ប្រឆាំងនឹងការឈ្លានពានរបស់កងទ័ពថៃ ដែលបានបំពានលើបូរណភាពទឹកដីកម្ពុជា៕
