ស្ត្រីម្នាក់ប្ដឹងពេទ្យមួយនៅអាមេរិក ក្រោយគ្រូពេទ្យភ្លេចដកទុយោអាហារចេញពីក្នុងខ្លួនពេលសម្រាលកូន ធ្វើឱ្យនាងឈឺជាង ៣៥ ឆ្នាំទម្រាំដឹង

ស្រ្តីម្នាក់ឈ្មោះ Deborah Lowe បានសម្រេចចិត្តប្តឹងមន្ទីពេទ្យមួយកន្លែងឈ្មោះ Mount Sinai នៅសហរដ្ឋអាមេរិក ដោយសារតែក្រុមគ្រូពេទ្យនៅទីនោះមិនដកទុយោអាហារចេញពីក្នុងខ្លួននាង ខណៈនាងវះកាត់ស្បូនកាលពី ៣៥ ឆ្នាំមុន បណ្តាលឱ្យរងទុក្ខវេទនាឈឺចាប់ពេញរាងកាយ។

កាលពីឆ្នាំ ១៩៨៩ កន្លងទៅ Lowe បានចូលទទួលសេវាកម្មទទួលការវះកាត់សម្រាលកូនភ្លោះនៅមន្ទីរពេទ្យ Mount Sinai នេះ តែដោយសារតែមិនបានសម្រេច ជាលទ្ធផលនាងត្រូវវះកាត់ស្បូនទាំងមូលជំនួសវិញ។ កាលនោះនាងបានប្រើគ្រឿងអុកស៊ីសែនអស់ ២ ខែ លើសពីនេះទៀតខាងគ្រូពេទ្យក៏បានដាក់ទុយោអាហារឱ្យនាងទៀត ប៉ុន្តែអ្វីដែលគួរឱ្យភ្ញាក់ផ្អើលនោះ គឺខាងគ្រូពេទ្យមិនបានដកចេញឱ្យនាងវិញទេ។ តាំងពីពេលនោះមក នាងតែងតែឈឺក្បាលប្រកាំង ពិបាកដកដង្ហើម និង ឈឺពោះ ថែមទាំងហើមពោះជាប្រចាំ។

នៅក្នុងឆ្នាំ ២០១០ នាងក៏បានសម្រេចចិត្តទៅមន្ទីរពេទ្យ និង មកដល់ឆ្នាំ ២០១៣ និង ឆ្នាំ ២០២៣ Lowe ក៏បានធ្វើការឆ្លុះមើលពោះវៀនធំរបស់ខ្លួន ប៉ុន្តែមិនបានឃើញអ្វីទាក់ទងនឹងការឈឺចាប់របស់នាងឡើយ។ លុះមកដល់ខែមេសា ឆ្នាំ ២០២៤ កន្លងទៅ នាងធ្វើការថតមើលម្តងទៀតនៅមន្ទីរពេទ្យ Froedtert ក្នុងទីក្រុង Milwaukee ទើបឃើញថា នៅក្នុងខ្លួននាងមានទុយោអាហារមួយ ដែលនៅសល់ពីការវះកាត់កាលពីឆ្នាំ ១៩៨៩ កន្លងទៅ។

យ៉ាងណាមិញ មកទល់ពេលនេះ Lowe ក៏បានកំពុងតែធ្វើការប្តឹងទៅកាន់មន្ទីរពេទ្យខាងលើ ដោយបានចោទទៅកាន់ក្រុមគ្រូពេទ្យថាបានបំពានកាតព្វកិច្ច មានការធ្វេសប្រហែស ដែលបង្កឱ្យនាងរងទុក្ខវេទនាទាំងផ្លូវកាយ និង ផ្លូវចិត្តអស់រយៈពេលជាច្រើនឆ្នាំ៕

ប្រភព៖ Sanook