ស្ដារកេរ្ដិ៍ឈ្មោះឡើងវិញ! ដេត ស្រីនាឌ ត្រូវបានជ្រើសរើសជាម៉ូឌែលតំណាងកម្ពុជាចូលរួមកម្មវិធីលំដាប់អន្តរជាតិដ៏ធំមួយនៅវៀតណាម

ចាប់តាំងពីវិលត្រឡប់ចូលប្រកួតវិស័យបវរកញ្ញាម្ដងទៀតក្នុងកម្មវិធី Miss Lakamo Cambodia ស្រីស្អាត ដេត ស្រីនាឌ ត្រូវបានមហាជនចាប់អារម្មណ៍តាមដានជាថ្មី ដ្បិតតែនាងមិនទាន់ទទួលបានក្ដីស្រឡាញ់ និង ការគាំទ្រពីមហាជនដូចមុន ប៉ុន្តែ ស្រីនាឌ កំពុងព្យាយាមសាងប្រជាប្រិយភាពឡើងវិញតាមរយៈសកម្មភាពផ្សេងៗសម្រាប់ជាតិ និង ដើម្បីលុបលាងកំហុសដែលបានកើតឡើងកន្លងមក។

យ៉ាងណាមិញ ស្របពេលជាបេក្ខភាពប្រកួតក្នុងកម្មវិធី Miss Lakamo Cambodia 2025 នេះដែរ ថ្មីៗនេះ កញ្ញា ដេត ស្រីនាឌ ក៏ទទួលបានឱកាសដែលត្រូវបានជ្រើសរើសជាតារាបង្ហាញម៉ូដតំណាងឱ្យកម្ពុជា ចូលរួមក្នុងកម្មវិធី Global Student Fashion Week នៅឯប្រទេសវៀតណាម រួមជាមួយនឹងតារាបង្ហាញម៉ូដជុំវិញពិភពលោកទៀតផង។

ក្នុងនោះ ដេត ស្រីនាឌ បានរៀបរាប់លើហ្វេសប៊ុកផេកថា ៖ «ជម្រាបសួរ! Xin Chao, Vietnam! នាងខ្ញុំនឹងលើកទង់ជាតិកម្ពុជាម្តងទៀតទៅកាន់ពិភពលោក នាងខ្ញុំពិតជារំភើបដែលត្រូវបានជ្រើសរើសជាតារាបង្ហាញម៉ូដតំណាងឱ្យកម្ពុជា នៅឯប្រទេសវៀតណាម ក្នុងចំណោមតារាបង្ហាញម៉ូដជុំវិញពិភពលោក នៅក្នុងកម្មវិធី Global Student Fashion Week! សូមចូលរួមជាមួយខ្ញុំ ដើម្បីបំពេញដំណើរនេះ នៅទីក្រុងហាណូយ ប្រទេសវៀតណាម ចន្លោះថ្ងៃទី ១៥-១៧ ខែមីនា ឆ្នាំ ២០២៥ ក្នុងកម្មវិធី Global Student Fashion Week»៕