ចំពោះទំនាក់ទំនងរវាងតារាចម្រៀងស្រី ពេជ្រ សោភា និង តារាសម្ដែងប្រុសរូបសង្ហា ឆឹម សក្កដា កន្លងមក តែងឆក់ការចាប់អារម្មណ៍តាមដានពីមហាជនអ្នកគាំទ្រខ្លាំងលើរឿងរ៉ាវស្នេហាដ៏ផ្អែមល្ហែមរបស់អ្នកទាំងពីរដែលបង្ហាញលើបណ្ដាញសង្គមជាហូរហែ។
យ៉ាងណាមិញ ប៉ុន្មានឆ្នាំចុងក្រោយនេះ ជុំវិញរឿងរ៉ាវស្នេហារវាងតារាប្រុសស្រីមួយគូនេះ ហាក់ស្ងប់ស្ងាត់ឃ្លាតឆ្ងាយគ្នាខ្លាំង ដែលពុំសូវបានឃើញអ្នកទាំងពីរមានសកម្មភាពជាមួយគ្នាដូចមុនឡើយ ទាំងសិល្បៈ និង ទំនាក់ទំនងស្នេហាផ្អែមល្ហែម ដោយភាគច្រើនគេឃើញបង្ហាញតែសកម្មភាពការងាររៀងៗខ្លួន។
ដោយឡែក ក្រោយស្ងប់ស្ងាត់មួយរយៈធំ និង ធ្វើឱ្យមហាជនហាក់ប្លែកចិត្តចំពោះទំនាក់ទំនងអ្នកទាំងពីរ មកដល់ថ្មីៗនេះ ក៏បានឃើញលើហ្វេសប៊ុករបស់ខាងប្រុសគឺ លោក ឆឹម សក្កដា បង្ហោះរូបភាពចាស់ៗរបស់លោកជាមួយនឹងអ្នកនាង ពេជ្រ សោភា រំឭកដល់អនុស្សាវរីយ៍ដ៏ផ្អែមល្ហែម ព្រមទាំងមានការចែករំលែកបន្តពីខាងស្រីផងដែរ ដោយកំពុងធ្វើឱ្យមហាជនអ្នកគាំទ្រតាមដានរបស់អ្នកទាំងពីររំភើបចិត្តជាថ្មី៕
