កន្លងមកមហាជនអ្នកតាមដានព័ត៌មានតារាច្បាស់ជាបានជ្រាបមកហើយ ពីរឿងបំណុលរបស់អ្នកដឹកនាំសម្ដែង លោក ឃុន ធារិទ្ធ ហៅ Rith Omega។ យ៉ាងណាមិញ កាលពីអំឡុងដើមឆ្នាំ ២០២៤ លោក Rith Omega ក៏បានចេញមុខបង្ហោះសារនិយាយរឿងបំណុលរបស់ខ្លួនបង្ហោះនៅលើបណ្ដាញសង្គម ដោយកាលនោះលោកបានដោះស្រាយបំណុលរួចរាល់មួយចំនួនហើយ ចំណែកមួយចំនួនទៀតក៏កំពុងតែដោះស្រាយ។
លើសពីនោះ ក្នុងការបង្ហាញវត្តមានលើបណ្តាញសង្គមជាថ្មីនោះ អ្នកដឹកនាំសម្តែងខាងលើក៏ធ្លាប់បានវិលត្រឡប់មកកាន់អាជីពចាស់ ដោយលោក Rith Omega បានមកដឹកនាំសម្តែង MV ល្បីៗជាច្រើន ហើយក្នុងនោះរួមមាន MV របស់ ពូឃ្លាំង និង ជាអ្នកគ្រប់គ្រងរបស់ ពូ ឃ្លាំង ព្រមទាំងសិល្បករមួយចំនួនទៀត។
យ៉ាងណាមិញ ស្រាប់តែនៅយប់ថ្ងៃទី ១០ ខែធ្នូ ឆ្នាំ ២០២៤ កន្លងទៅនេះ ស្រាប់តែលោក Rith Omega បានចេញមកបង្ហោះសារយ៉ាងភ្ញាក់ផ្អើលមួយពីរឿងបំណុលជាថ្មី ដោយលោកជួបបញ្ហាប្រមាណជា ៨ ខែមកហើយ ដែលប៉ះពាល់ដល់ម្ចាស់បំណុល ហើយពេលនេះលោកចេញមុខមកដោះស្រាយបញ្ហាបំណុលឡើងវិញហើយ។
ក្នុងនោះ លោក Rith Omega បានរៀបរាប់ថា៖ «សុំទោសម្ចាស់បំណុលទាំងអស់របស់ខ្ញុំ ដែលកន្លងមកខ្ញុំធ្វើឱ្យអ្នកទាំងអស់គ្នាពិបាកដោយសារខ្ញុំ ព្រោះតែខ្ញុំក៏ត្រូវជួបបញ្ហាភ្លាមៗអស់រយៈពេល ៨ ខែ ដែលជីវិតខ្ញុំធ្លាក់ក្នុងភពដ៏ងងឹត។ ពេលនេះខ្ញុំបានត្រលប់មកវិញហេីយ ត្រលប់មកដោះស្រាយគ្រប់បញ្ហា និងបំណុលដែលខ្ញុំបានជំពាក់អ្នកទាំងអស់គ្នាតាមដំណាក់កាលម្តងម្នាក់ៗ រហូតទាល់តែអស់។ ប៉ុន្តែខ្ញុំសុំពេលអ្នកទាំងអស់គ្នាមួយរយៈ ដើម្បីឱ្យខ្ញុំងើបឈរឡើងវិញ និង បានរៀបចំការងារឡើងវិញសិន រៀបចំស្ថានភាពជីវិតឡើងវិញសិន។ ខ្ញុំនឹងត្រលប់មកធ្វើការផ្នែកខាងផលិត MV / Short film / Artists Manager ជាបន្តដើម្បីបានចំណូល ដោះស្រាយសងម្ចាស់បំណុល ដែលខ្ញុំធ្លាប់បានជំពាក់កន្លងមក»៕
