បើគិតមកដល់ពេលនេះ រយៈពេលប្រមាណជា ៧ ខែ មកហើយ ដែលតារាចម្រៀងរ៉េបជំនាន់ថ្មី លោក OG Golden បានឈ្នះក្លាយជាម្ចាស់ជ័យលាភីកម្មវិធី Rapper Fighter រដូវកាលទី ១។
ក្រោយពីទទួលបានជ័យលាភីក្នុងការប្រកួតចម្រៀងរ៉េបខាងលើហើយ លោក OG Golden ក៏កំពុងបន្តដំណើរលើវិថីសិល្បៈយ៉ាងជោគជ័យដែរ ដោយក្នុងនោះ អ្នករ៉េបជំនាន់ថ្មីវ័យក្មេងរូបនេះ គឺមានអ្នកគាំទ្រជាច្រើន។
យ៉ាងណាមិញ ថ្មីៗនេះ OG Golden ក៏បានធ្វើឱ្យអ្នកគាំទ្រមានការភ្ញាក់ផ្អើលយ៉ាងខ្លាំង ខណៈលោកបានបង្ហោះរូបភាពអំឡុងពេលភាពយន្តនៅលើផេកហ្វេសប៊ុកផ្លូវការ ដោយអមនឹងសារថា៖ «អនុស្សាវរីយ៍ ក្នុងការថតកុនត្រូវបានបញ្ចប់ ស្ងាត់បាត់ខ្ញុំមួយរយៈគឺខ្ញុំរវល់ធ្វើអ្វីដែលគ្រប់គ្នាមិនធ្លាប់ឃើញ។ អរគុណដល់ក្រុមការងារខាង Production ដែលយកចិត្តទុកដាក់ មើលថែតួទាំងសម្លៀកបំពាក់ ចំណីអាហារ Make up និង ផ្ដល់ភាពកក់ក្ដៅ ស្នាមញញឹម បានសប្បាយជុំគ្នាទៀត។ STAY TUNE GUYYY»។
ក្រោយការបង្ហោះនោះហើយ អ្នកគាំទ្រជាច្រើនក៏បានលាន់មាត់ថា OG Golden រ៉េបសុខៗ ទៅថតភាពយន្តស្ងាត់ៗ បន្ថែមជំនាញមួយទៀត។ លើសពីនោះ អ្នកគាំទ្រជាច្រើនក៏រង់ចាំមើលថា ភាពយន្តរបស់ OG Golden សម្តែងជារឿងអ្វី៕
