នាពេលថ្មីៗនេះ បេឡាជាតិសន្តិសុខសង្គម បានឆ្លើយតបទៅនឹងសំណួរដែលមានអ្នកសួរច្រើនជាងគេនៅលើបណ្ដាញសង្គម ដែលបានសួរថា ៖ «ពេលខ្ញុំឈប់ធ្វើការ តើខ្ញុំអាចបន្តបង់ភាគទានមក ប.ស.ស. (បុគ្គលស្វ័យនិយោជន៍) ដោយខ្លួនឯងបានដែរឬទេ? បើបាន តើត្រូវធ្វើដូចម្តេច?»
ទាក់ទិនទៅនឹងសំណួរខាងលើ បេឡាជាតិសន្តិសុខសង្គម បានឆ្លើយឱ្យដឹងថា ក្នុងករណីនេះគឺបងប្អូនអាចបង់បាន តែក៏ត្រូវមានលក្ខខណ្ឌ ៣ ដែលអាចបង់ដោយខ្លួនឯងបាន រួមមាន៖
– ត្រូវមានអាយុក្រោម ៦០ ឆ្នាំ គិតត្រឹមកាលបរិច្ឆេទស្នើសុំ
– មានប្រកបមុខរបររកចំណូលផ្ទាល់ខ្លួន ដោយមិនពាក់ព័ន្ធនឹងប្រាក់ឈ្នួល ឬប្រាក់បៀវត្ស
– មិនមានប្រើប្រាស់បុគ្គលិកនៅក្នុងសកម្មភាពប្រកបមុខរបររបស់ខ្លួន
សម្រាប់ឯកសារភ្ជាប់វិញ គឺត្រូវមានអត្តសញ្ញាណប័ណ្ណសញ្ជាតិខ្មែរច្បាប់ដើមមានសុពលភាព និង ត្រូវមានវិញ្ញាបនបត្រចុះឈ្មោះអ្នកសេដ្ឋកិច្ចក្រៅប្រព័ន្ធ។ សម្រាប់ព័ត៌មានបន្ថែម អាចទំនាក់ទំនងទៅលេខ ១២៨៦ ឬ ១២៩៧៕
