ជាមិត្តភក្តិនឹងគ្នា មិនប្រាកដថាគេប្រាប់យើងគ្រប់យ៉ាងនោះទេ ជួនរឿងខ្លះជារឿងផ្ទាល់ខ្លួន គេក៏ចង់រក្សាភាពឯកជន ជាពិសេសរឿងទំនាក់ទំនងស្នេហានេះតែម្តង។ យ៉ាងណាមិញ បើចង់សម្គាល់ដឹង អ្នកជំនាញឱ្យចាប់តាមរយៈ ៥ ចំណុចនេះ។
១. ផ្លាស់ប្តូរទម្លាប់
បើមិត្តរបស់អ្នកផ្លាស់ប្តូរទម្លាប់ពេលវេលា ឬ ចំណាយពេលជាមួយអ្នកតិចជាងមុន ឧទាហរណ៍ដូចជា និយាយទូរស័ព្ទច្រើនជាងមុន ជាប់ឆាតច្រើនជាង ឬ ចេញទៅក្រៅខុសម៉ោងធម្មតា នេះបង្ហាញថាគេកំពុងចំណាយពេលជាមួយនរណាម្នាក់ទៀត ដែលអាចជាដៃគូរ៉ូមែនទិក។
២. លាក់ការសម្ងាត់ច្រើនជាងមុន
មិត្តរបស់អ្នកហាក់ប្រយ័ត្នប្រយែង ឬ បង្ហាញអាការដូចខ្លាចគេដឹងរឿងផ្ទាល់ខ្លួនតាមរយៈអ្វីមួយ ដូចជា ទូរស័ព្ទ គណនីបណ្តាញសង្គម ឬ ជីវិតផ្ទាល់ខ្លួន។ គេនឹងឆ្លើយបង្វៀននូវរាល់សំណួរទាក់ទងនឹងគម្រោង ឬ នរណាម្នាក់ដែលគេកំពុងចំណាយពេលជាមួយ។
៣. អារម្មណ៍ និង អាកប្បកិរិយាផ្លាស់ប្តូរ
បើមិត្តរបស់អ្នកមើលទៅរីករាយជាងមុន ដូចជាមើលទូរស័ព្ទញញឹមតែឯង, សុខៗញញឹមតែឯង, លាក់បាំងអារម្មណ៍សម្ងាត់ជាងមុន វាជាសញ្ញាបង្ហាញថា គេកំពុងមានទំនាក់ទំនងស្នេហាហើយ។
៤. និយាយលើកពីនរណាម្នាក់ តែមិនប្រាប់ជានរណា
បើទោះគេលាក់ការសម្ងាត់ ប៉ុន្តែគេអាចនឹងនិយាយបង្ហើបពីមនុស្សថ្មីណាម្នាក់ ចូលមកក្នុងជីវិតរបស់គេ។ ជួនគេអាចនិយាយបែបប្រយោល ឬ លើកឧទាហរណ៍ម្នាក់នោះជាមិត្តភក្តិ មិត្តរួមការងារ ឬមនុស្សទើបជួបថ្មីថ្មោងណាមួយ ដែលអាចជាតម្រួយ។
៥. ផ្លាស់ប្តូររូបរាង
មិត្តរបស់អ្នកនឹងផ្តោតយកចិត្តទុកដាក់លើរូបរាងកាយច្រើនជាងមុន រាប់តាំងពីការស្លៀកពាក់ ក្លិនខ្លួន ឬ ការតុបតែងមុខធ្វើសក់ខុសពីសព្វដង រួមទាំងប្រើរបស់ប្លែកៗ។ ពេលខ្លះគេអាចនឹងពាក់សម្លៀកបំពាក់ថ្មីប្លែក ដែលជាកាដូពីមនុស្សដែលគេស្រលាញ់ផងដែរ។
បើទោះមិត្តភក្តិរបស់អ្នកលាក់ការសម្ងាត់រឿងផ្ទាល់ខ្លួន ក្នុងនាមជាមិត្តអ្នកក៏ត្រូវគោរពភាពផ្ទាល់ខ្លួន និង ព្រំដែនរបស់គេផងដែរ។ បើគេចង់រក្សាទំនាក់ទំនងជាសម្ងាត់ គេប្រាកដជាមានហេតុផលរបស់គេ។ បើអ្នកចង់ដឹង ចង់ឃើញ អ្នកគ្រាន់តែបង្ហាញពួកគេថាអ្នកតែងតែគាំទ្រ និង នៅទីនោះជាមួយគេបើគេរីករាយនឹងចែករំលែក។ ជៀសវាងការស្មានឬសន្មត ព្រោះវាអាចធ្វើឱ្យប៉ះពាល់ដល់មិត្តភាពរបស់អ្នក៕
