កាលពីថ្ងៃទី ៣ ខែឧសភា ឆ្នាំ ២០២៥ កន្លងទៅនេះ សារព័ត៌មានក្រៅប្រទេសបានរាយការណ៍ពីករណីមួយ ដែលមានឧទ្ធម្ភាចក្រមួយគ្រឿងខូចកណ្តាលអាកាស បណ្តាលឱ្យពីឡុតបង្ខំចិត្តចុះបន្ទាន់ តែមានអីចុះទៅចំវាលភក់កន្លែងសំបុកក្រពើ ធ្វើឱ្យទាំងអ្នកដំណើរ ទាំងពីឡុតជាប់នៅទីនោះជាង ៣៦ ម៉ោងដាច់បាយដាច់ទឹក។
តាមព័ត៌មានបានឱ្យដឹងថា ហេតុការណ៍មួយនេះបានកើតឡើងនៅក្នុងប្រទេស Bolivia ដោយនៅថ្ងៃកើតហេតុឧទ្ធម្ភាចក្រខាងលើបានផ្ទុកអ្នកដំណើរ ៥ នាក់ ដែលក្នុងនោះមានអ្នកបើកបរម្នាក់។ នៅសុខៗស្រាប់តែឧទ្ធម្ភាចក្រចាប់ផ្តើមបាត់បង់លំនឹង និង ដាំក្បាលចុះភ្លាមៗ ទើប ពីឡុត ក៏បង្ខំចិត្តចុះចតបន្ទាន់នៅកន្លែងដែលអាចចុះបានភ្លាម ដើម្បីសុវត្ថិភាព។
តែយ៉ាងណាមិញ ជាចៃដន្យឧទ្ធម្ភាចក្របានចុះទៅចតនៅវាលភក់មួយកន្លែងក្នុងព្រៃអាម៉ាហ្សូន ហើយអ្វីគួរឱ្យហួសចិត្តនោះ គឺចតចំសំបុកក្រពើ បណ្តាលឱ្យអ្នកដំណើរទាំងអស់ភ័យស្លន់ស្លោម្តងទៀត ហើយនាំគ្នាមកឈរឱបគ្នានៅលើឧទ្ធម្ភាចក្រ។ ពួកគេបានញ៉ាំម្សៅមីដែលបានយកមកតាមខ្លួន ប៉ុន្តែមិនបានផឹកទឹកនោះទេ ព្រោះពួកសត្វក្រពើកំពុងចោមរោមពួកគេនៅចម្ងាយតែ ៣ ម៉ែត្រប៉ុណ្ណោះ។ ខាងអាជ្ញាធរក៏បានស្វែងរកឧទ្ធម្ភាចក្រនេះភ្លាមៗដែរ ក្រោយពីបានបាត់ចេញពីសញ្ញាត្រួតពិនិត្យ តែចុងក្រោយឧទ្ធម្ភាចក្រនេះត្រូវបានរកឃើញដោយអ្នកនេសាទ ហើយអ្នកដំណើរទាំងអស់ត្រូវបានគេជួយសង្រ្គោះ និង បញ្ជូនទៅមន្ទីរពេទ្យ៕
ប្រភព៖ Khaosod
