និយាយពីកំពូលតារាចម្រៀងស្រី មាស សុខសោភា មួយរយៈក្រោយនេះ ត្រូវបានគេចាប់អារម្មណ៍ថារាល់ការបង្ហោះរូបភាព ក៏ដូចជាការលើកឡើងផ្សេងៗរបស់អ្នកនាងលើហ្វេសប៊ុក បានធ្វើឱ្យមហាជនអ្នកលេងបណ្ដាញសង្គមចែករំលែក និង បញ្ចេញមតិវែកញែកច្រើន មានទាំងមតិពេញចិត្ត និង មានមតិខ្លះរិះគន់មិនពេញចិត្តផងដែរ។
ដោយឡែក ក្រោយទទួលរងការវែកញែក និង មានមតិរិះគន់មួយចំនួនលើការបង្ហោះរបស់ខ្លួនកន្លងមកនោះ ថ្មីៗនេះ ក៏បានឃើញកំពូលតារាចម្រៀងស្រី មាស សុខសោភា បានបង្ហោះរូបភាពប៉ុន្មានសន្លឹកភ្ជាប់ជាមួយមតិមួយយ៉ាងភ្ញាក់ផ្អើល ដែលអ្នកនាងហាក់ចង់រៀបរាប់ពីការខិតខំសាងភាពល្បីល្បាញដោយសមត្ថភាពរបស់ខ្លួនក្នុងវិស័យចម្រៀង ដោយមិនមានការទិញទឹកចិត្តអ្នកគាំទ្រ ព្រមទាំងចោទសួរទៅកាន់អ្នករិះគន់លើរូបនាង ទាំងដែលអ្នកនាងពុំមានកំហុសទៀតផង។
ក្នុងនោះ អ្នកនាង មាស សុខសោភា បានរៀបរាប់ថា ៖ «ភាពល្បីល្បាញរបស់នាងខ្ញុំ មិនមែនបានមកពីការយកលុយទៅទិញ ឬជួលអ្នកណាដើម្បីឱ្យមានការមកជួយគាំទ្រពីសំណាក់មហាជននោះឡើយ អ្វីដែលនាងខ្ញុំមានមកដល់ថ្ងៃនេះ គឺខ្លួនខ្ញុំជាអ្នកជួយខ្លួនឯង នោះគឺការយកសំឡេងច្រៀងពីធម្មជាតិរបស់នាងខ្ញុំមកបំពេអារម្មណ៍ជូនទៅដល់មហាជន ដែលវាជាសច្ចធម៌មួយដែលនាងខ្ញុំត្រូវយកមកឆ្លុះបង្ហាញ។ ចំណែកខ្លួនអ្នកវិញ តើអ្នកមានមហាជនប៉ុន្មាននាក់ ដែលគាំទ្រអ្នក ឱ្យលើសរូបនាងខ្ញុំហើយឬនៅ? ហេតុអីចេញមករិះគន់នាងខ្ញុំ ទាំងខ្ញុំគ្មានកំហុសបែបនេះទៅវិញ»៕
