មហាជនច្បាស់ជាបានជ្រាបមកហើយ ក្នុងចំណោមការបង្កើតមូលនិធិ ជួយដល់កងទ័ពនៅតាមតំបន់ព្រំដែន និង ជនភៀសសឹក នោះ តារាកំប្លែង នាយ ពាក់មី ក៏មានមូលនិធិដូចគ្នា ដោយលោកបានរៀបចំស្បៀង ថវិកា និង សម្ភារប្រើប្រាស់ផ្សេងៗទៅកាន់តំបន់ក្តៅជាបន្តបន្ទាប់មកហើយ។
ក្នុងនោះដែត នាយ ពាក់មី និង ក្រុមការងារក៏បានទៅដល់តំបន់ប៉ែកខាងខេត្តព្រះវិហារ និង ឧត្តរមានជ័យ ក៏ដូចជាបានផ្ញើអំណោយដល់ខាងខេត្តបាត់ដំបងជាដើម។ លើសពីនោះ នាយ ពាក់មី ក៏បានចុះសួរសុខទុក្ខ និង ជូនថវិកាដល់កងទ័ពសម្រាកនៅមន្ទីរពេទ្យតាមតំបន់ខ្លះដែរ។
យ៉ាងណាមិញ នៅថ្ងៃទី ០៧ ខែសីហា ឆ្នាំ ២០២៥ នេះ នាយ ពាក់មី ក៏បានបង្ហោះសារ សួរសុខទុក្ខទៅកាន់កងកម្លាំងឈរជើងតាមតំបន់ផ្សេងទៀតនៅជាប់ព្រំដែន ដែលមិនមែនជាតំបន់សមរភូមិក្ដៅ មិនសូវមានអ្នកទៅដល់ដឹងសុខទុក្ខនោះ អាចជម្រាបលោកបានថាមានតម្រូវការអ្វីឱ្យជួយបាន។
នាយ ពាក់មី បានរៀបរាប់ថា៖ «ភាគច្រើនបងប្អូនយើង ដឹង និង បារម្ភពីកងទ័ពយើងនៅប្រាសាទតាមាន់ធំ, ប្រាសាទតាក្របី, មុំ ៣, វាលឥន្ទ្រី, ភ្នំទ្រព្យ ព្រោះជាតំបន់ក្តៅ តែនៅ ពោធិ៍សាត់, ប៉ៃលិន, កោះកុង ក៏មានកងទ័ពយើងឈជើងការពារគ្រប់វិនាទីដែរ ទោះមិនមានកាប្រយុទ្ធគ្នាមែន តែក៏មិនបានគេងពេញភ្នែកដែរ ព្រោះត្រូវត្រៀមជានិច្ច។ ខ្ញុំសូមសួរសុខទុក្ខ និង នឹករឭកដល់វីរកងទ័ពយើងនៅតំបន់ដែលមិនសូវល្បី ពីចម្ងាយផង! តើមានអីដែលពួកខ្ញុំអាចជួយបានអត់?»៕
