នៅព្រឹកថ្ងៃទី ០៣ ខែមិថុនា ឆ្នាំ ២០២៥ នេះ តាមរយៈការបង្ហោះរបស់លោក អ៊ួ តារា អគ្គលេខាធិការសហព័ន្ធកីឡាគុនល្បុក្កតោកម្ពុជា បានជម្រាបនូវដំណឹងពីសុខភាពរបស់លោកគ្រូតាគុនល្បុក្កតោ សាន គឹមស៊ាន ហៅលោកគ្រូតាក្រមាមាស អនុប្រធានសហព័ន្ធកីឡាគុនល្បុក្កតោកម្ពុជា កំពុងសង្គ្រោះបន្ទាន់នៅមន្ទីរពេទ្យ។
ក្នុងនោះ តាមរយៈការបង្ហោះរបស់លោក លោក អ៊ួ តារា អគ្គលេខាធិការសហព័ន្ធកីឡាគុនល្បុក្កតោកម្ពុជា បានរៀបរាប់ថា៖ «ទទួលដំណឹងអំពីលោកគ្រូតា សាន គឹមស៊ាន ដែលលោកកំពុងសង្គ្រោះបន្ទាន់ សូមវត្ថុស័ក្កិសិទ្ធិក្នុងលោក និងគុណបុណ្យដែលលោកគ្រូតាបានជួយជាតិមាតុភូមិ នឹងជួយឱ្យលោកតាឆ្លងផុតពីគ្រោះភ័យនេះ ដើម្បីជាម្លប់ដល់កូនចៅ»។
យ៉ាងណាមិញ អ្វីដែលកាន់តែតក់ស្លុតនោះ នៅរសៀលថ្ងៃដដែល លោក អ៊ួ តារា បានជម្រាបឱ្យដឹងបន្ថែមថា ព្រឹទ្ធាចារ្យក្រមាមាស សាន គឹមស៊ាន បានទទួលមរណភាពក្នុងជន្មាយុ ៨០ ឆ្នាំ ដោយសារជំងឺគាំងបេះដូង។ ក្នុងនោះ ដំណឹងខាងលើនេះ បានធ្វើឱ្យមហាជនតក់ស្លុត និង សោកស្តាយយ៉ាងខ្លាំងនៃការបាត់បង់លោកគ្រូតាគុនល្បុក្កតោ សាន គឹមស៊ាន៕
