នៅម៉ោងប្រមាណ ១២ យប់ ឈានចូលថ្ងៃទី ២២ ខែសីហា ឆ្នាំ ២០២៥ នេះ នៅក្នុងប្រទេសថៃ មានករណីប៉ូលិសមួយរូប ផឹកស្រាស្រវឹងជោក រួចបានបង្កហេតុបាញ់រះទៅលើគ្រួសារខ្លួនឯង បណ្តាលឱ្យសមាជិកគ្រួសារ ១ នាក់បានស្លាប់ និង ១ នាក់ទៀតបានរងរបួស។
តាមព័ត៌មានបានឱ្យដឹងថា ហេតុការណ៍នេះ បានកើតឡើងនៅតូបលក់គ្រឿងទេសមួយកន្លែង ស្ថិតក្នុងឃុំ Sai Daeng ស្រុក Muang ខេត្ត Ranong ដោយក្នុងនោះជនបង្កមានវ័យ ៥៤ ឆ្នាំ គឺជាប៉ូលិសអន្តោរប្រវេសន៍ប្រចាំខេត្ត Ranong ផ្ទាល់។ នៅថ្ងៃកើតហេតុ ជនបង្កបានផឹកស្រាជាមួយមិត្តភក្តិ រួចក៏បានជិះទៅរករឿងបងស្រីបង្កើតនៅតូបលក់ ហើយបានឈ្លោះទាស់ទែងគ្នា រហូតដល់ជនបង្កបានទាញកាំភ្លើងបាញ់រះ បង្កឱ្យបងស្រីអាយុ ៧១ ឆ្នាំម្នាក់ស្លាប់ និង បងស្រីម្នាក់ទៀតអាយុ ៧៥ បានរងរបួស។ ក្រោយពីបង្កហេតុរួច ជនបង្កក៏បានរត់គេចខ្លួនបាត់។
យ៉ាងណាមិញ តាមព័ត៌មានបានឱ្យដឹងថា ជនបង្កគឺជាកូនប្រុសពៅក្នុងចំណោមបងប្អូនចំនួន ៨ នាក់ ហើយតាំងពីដើមមក ជនបង្កតែងតែរករឿងឈ្លោះទាស់ទែងជាមួយនឹងបងៗជាប្រចាំ ជាពិសេសឱ្យតែពេលផឹកស្រវឹង គឺតែងគិតថាគ្មានអ្នកខ្វល់ និង អ្នកស្រឡាញ់ខ្លួន។ ដោយឡែក ក្រោយពីបង្កហេតុរួច ជនបង្កក៏បានរត់គេចខ្លួនបាត់ ហើយពេលនេះអាជ្ញាធរកំពុងតែតាមចាប់ជនបង្ក មកដាក់ទោសទៅតាមផ្លូវច្បាប់៕
ប្រភព៖ Khaosod
