សេដ្ឋិនីវ័យ ៥៦ ឆ្នាំម្នាក់ ខ្លាចកូនប្រសាច្បងលេបទ្រព្យសម្បត្តិតែម្នាក់ឯង ក៏សម្រេចចិត្តយកកូនមួយទៀត ស្រាប់តែកូនប្រុសបង្កើតខឹងដល់ថ្នាក់កាត់កាលគ្នាចោល

មានរឿងរ៉ាវមួយ ដែលកំពុងធ្វើឱ្យមហាជននៅតាមបណ្តាញសង្គមចិនផ្ទុះការវែកញែក ដោយមានសេដ្ឋិនីម្នាក់ សម្រេចចិត្តយកកូនមួយទៀតនៅអាយុ ៥៦ ឆ្នាំ ព្រោះតែខ្លាចកូនប្រសាលេបត្របាក់ទ្រព្យសម្បត្តិខ្លួន។

តាមព័ត៌មានបានឱ្យដឹងថា សេដ្ឋិនីរូបនេះ ជាអ្នកជំនួញម្នាក់មកពីទីក្រុងសៀងហៃ ប៉ុន្តែគ្រួសារនាងជាគ្រួសារតូច ដោយមានកូនប្រុសតែម្នាក់គត់ ដែលជាកូនទោល។ លុះពេលកូនប្រុសរៀបការ ក៏ទទួលបានកូនស្រីតែម្នាក់ជាចំណងដៃ ដែលធ្វើឱ្យសេដ្ឋិនីនេះចាប់ផ្តើមបារម្ភថា ទ្រព្យសម្បត្តិដែលខ្លួនប្រគល់ឱ្យកូនប្រុស នឹងធ្លាក់ទៅដល់ដៃចៅស្រី ហើយអាចនឹងរបូតទៅដល់ខ្សែស្រឡាយម្តាយរបស់នាង ដែលជាកូនប្រសាស្រីរបស់ខ្លួននោះ។

ដោយសារតែគិតឃើញបែបនេះហើយ សេដ្ឋិនីរូបនេះក៏បានសម្រេចចិត្តយកកូនប្រុសម្នាក់ទៀត ទាំងដែលមានវ័យ ៥៦ ឆ្នាំទៅហើយ គឺដើម្បីទប់ទ្រព្យសម្បត្តិមិនឱ្យធ្លាក់ទៅលើដៃចៅស្រីទាំងអស់។ យ៉ាងណាមិញ កូនប្រុស និង កូនប្រសាក៏កើតការមិនពេញចិត្ត និង ខ្មាសសាច់ញាតិ ដែលឪពុកម្តាយមានកូនថែមទៀតនៅវ័យបែបនេះ រួចក៏បានកាត់កាលឪពុកម្តាយចោល មិនដែលមកជាន់ផ្ទះទៀតឡើយ។

រីឯឪពុកម្តាយវិញ ក៏កាន់តែហត់នឿយក្នុងការចិញ្ចឹមកូនតូច ព្រោះវ័យកាន់តែជ្រេទៅហើយ។ មកដល់ត្រឹមនេះ ទើបតែដឹងខ្លួនថា សម្រេចចិត្តខុសទាំងអស់៕

ប្រភព៖ Sanook