មហាជនតាមដានបណ្តាញសង្គមហ្វេសប៊ុក ពាក់ព័ន្ធនឹងរឿងរ៉ាវរបស់ MC Vutha ដែលប្រើពាក្យសម្តីលេបខាយបៀតបៀតនលើ កញ្ញា មុន្នរស្មី ជាតារាសម្តែង និង ជាតារាម៉ូដែល នៅតែជាប្រធានបទក្តៅគគុក ខណៈ MC Vutha បានចេញបង្ហោះវីដេអូសុំទោសចំនួន ២ដង រួចហើយក្តី។
ក្នុងនោះដែរ មហាជន ជាពិសេសមិត្តក្នុង និង ក្រៅសិល្បៈជាច្រើន បានសំណូមពរដល់ក្រសួងពាក់ព័ន្ធរួមមាន ក្រសួងកិច្ចការនារី និង ក្រសួងព័ត៌មានឱ្យជួយដោះស្រាយលើបញ្ហានេះទៀតផង។
ដោយឡែកនៅព្រឹកថ្ងៃទី ៤ ខែមីនា ឆ្នាំ ២០២៥ នេះ, ក្រុមការងារនៃក្រសួងព័ត៌មាន និងក្រសួងកិច្ចការនារី ដឹកនាំដោយឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានសម្របសម្រួល និង ដឹកនាំកិច្ចប្រជុំពិនិត្យលើក្រមសីលធម៌វិជ្ជាជីវៈ និង ការប្រើប្រាស់ពាក្យសម្តីលេបខាយ បៀតបៀនលើស្ត្រីភេទ។
ការប្រជុំសម្របសម្រួលនេះ ធ្វើឡើងបន្ទាប់ពី ពិធីករកីឡាប្រដាល់ ឈ្មោះ ជួប វុត្ថា បានប្រើប្រាស់ពាក្យសម្តីលេបខាយ បៀតបៀនលើស្ត្រីភេទ ដែលធ្វើឱ្យប៉ះពាល់ដល់កិត្តិយស សេចក្តីថ្លៃថ្នូររបស់កញ្ញា ឆឹង ច័ន្ទមុនីរស្មី តាមរយៈវីដេអូដែលបានផ្សព្វផ្សាយតាមបណ្តាញសង្គម កាលពីថ្ងៃទី ១ ខែមីនា ឆ្នាំ ២០២៥។
ជាលទ្ធផល ពិធីករឈ្មោះ ជួប វុត្ថា ហៅ MC Vutha បានបង្ហាញការសោកស្តាយ និង សូមអភ័យទោសជាសាធារណៈចំពោះប្អូនស្រី ឆឹង ច័ន្ទមុនីរស្មី និង ស្ត្រីគ្រប់រូប ព្រមទាំងសាធារណជនចំពោះកំហុសឆ្គងដោយខ្វះការពិចារណាទៅកាន់ស្ត្រី ដែលធ្វើឱ្យប៉ះពាល់កិត្តិយសស្ត្រី។
លើសពីនោះ ក្រោយពីបញ្ចប់កិច្ចប្រជុំខាងលើនេះ មហាជនក៏បានឃើញ MC Vutha បានចេញមកបង្ហោះសារសុំទោសជាថ្មីលើគណនីហ្វេសប៊ុកថា៖ «បន្ទាប់ពីមានកាណែនាំរបស់ឯកឧត្តមរដ្ឋមន្ត្រីក្រសួងព័ត៌មាន និង លោកជំទាវតំណាងក្រសួងកិច្ចកានារី ខ្ញុំបាទជួប វុត្ថា ក៏សូមទោសជាសាធារណៈសាជាថ្មីម្តងទៀតទៅកាន់ប្អូនស្រី ឈឹង ចន្ទមុន្នីរស្មី និងអ្នកម្តាយ ក៏ដូចជាបងប្អូនស្ត្រីទាំងអស់ផងដែរ»៕
